عفراء علوي محمدي- كود//
أعضاء اللجنة الخاصة بالنموذج التنموي بمعية مجموعة من الباحثين شافو، فندوة عن بعد حول تقنين استهلاك الحشيش، اليوم الخميس فالصباح، أنه خاص تسوية وضع الفلاحين، اللي كيغرسوها بشكل غير منتظم، واللي مجموعة منهم كيعيشو فوضعية مهمشة بزاف، وخاص يكونو أبحاث كثيرة حول هذ النبتة، وتدرس إيجابياتها وسلبياتها.
فهذ الصدد، قال محمد الرامي، رئيس جامعة عبد المالك السعدي، اللي تمت استضافتو من طرف اللجنة، أن البحث العلمي فهذ المجال مهم، وخاص التركيز عليه، بحكم أن بزاف ديال الأبحاث فهذشي ماكتمشيش بعيد.
من جهة ثانية، كيشوف الرامي أن العقليات صعيب تتبدل، ويتم اعتبار الحشيش حاجة إيجابية ونافعة عوض ما تعتبر حاجة مضرة، بحكم كاين الإكراه ديال القانون “والأبحاث اللي كتدار عليه فالمختبرات ومن أجل أخد عينات منو كيخص الموافقة من السلطات، وماشي ساهل تخاد، وحتى الفينونسمول اللي كتعطي الدولة قليل، وهذشي اللي كيدفع المختبرات يخدمو مع مختبرات أوروبيين”.
وبدورها، الإكسبير كاميليا بنسكور كتقول بأن جميع الدول اللي قننات استعمال الحشيش وعطاتو أهمية ووظفاتو فالأبحاث ديالها دارت لاباس، وولا عندها دخل مزيان، وسمحات باستهلاك ديالو فنسبة تعادل او تقل عن 30 فالمية، وعطات مثال بدولة اللاووس اللي قننات استعمال “الماريكَوانا”.
ومن الأمور اللي ممكن تستعمل فيها نبتة الحشيش، ويستثمر فيها المغرب، تكلمات كاميليا فمداخلتها على مجالات العلاج والتجميل، كيف كيمكن العمل على تحويل هذ لابلونط وتوضيفها فمواد كثيرة، وقالت بللي شركة كوسيمار وشركات أخرى على شاكلتها كيمكن تقوم بهذ المهمة، واللي متخصصة فتحويل النباتات.
وقالت بللي لازون اللي كيتغرس فيها القنب الهندي فالشمال مازال كتعاني من الفقر والهشاشة، وباش تخرج من هذشي خاص التحكم فإنتاج الحشيش فالجانب الاقتصادي، كيف كيخص التشجيع على السياحة فهذ المنطقة وجذب السياح إليها من الخارج، ووضع زون صغيرة اللي غتمكنهم من استهلاك الحشيش.
واقترحات بنسكور حلول لتقنين هذ المادة فالبداية، وقالت “خاص تكون عندنا بلاصة صغيرة ومحدودة وفيها بنية تحتية مزيانة ونكولابوريو مع الدوليين فهذشي خاصة بهذ المادة هذي، نديرو فيها مخيم سياحة، وديسبونسير او سبيطار، وهكذا نبداو نستثمرو فأمور كبر، أما الفلاحة اللي كيزرعوه بشكل عشوائي، فغيمكن نقنعوهم بانهم يحولو ضيعاتهم لوحدات مهنية فصناعات بديلة، خصوصا فيهم اللي عندهم إمكانيات، خاصنا نخرجوهم من هنا باش فمرحلة أولى، وهذشي غيساعد على التقنين..”
وشاطر رئيس جامعة عبد المالك السعدي بنسكور فهذ الطرح، وقال بللي خاص الاهتمام بالسياحة، وذكر أن الجامعة ديالو عقدات لقاءات كثيرة لتشجيع السياحة فالمناطق المهمشة دالريف، وهذشي فكليات مختلفة، كيف دارت دورات تكوينية لمجموعة من الموظفين فالفنادق فهذ الباب.
