عفراء علوي محمدي- كود//
معلومات كتروج هذ الأيام على دراسة داروها طلبة وأساتذة فكلية العلوم بالقنيطرة، كتقول أن الموناضة ديال “هاواي” فيها 14 مادة خطيرة وقاتلة بنسبة ديال 100 فالمية، تقدر تتسبب للأشخاص فالسرطان بعد تجاوز سن ال50.
“كود” سولات رئيس جامعة بن طفيل على هذ الدراسة، وقال بللي ماعندوش عليها خبار، لا هو لا عميد كلية العلوم، وأكد أن هذ الدراسات ماشي ثابتة، حيت ممكن الناس يكونو خدمو على برودوي تقادم ودازت عليه لاداط ديال الفاليديطي، أو مابقاش صالح، كيف ممكن تكون أمور أخرى، لكن “الجامعة ماعندهاش الحق تخرج مسألة بهذ الحجم إلى ماكانش عندها اليقين التام والمطلق بان هذشي كاين.. ودراسات من هذ القبيل كتكون بتنسيق مع الدولة اللي عندها سيركويات خاصين بدراسة المواد الغذائية “، على حد تعبيرو.
وقال حتى إلى الجامعة توصلات لنتائج بحال هذي ماغديش تخرجها، لكن غتعطيها للمراقبة، باش متتحملش مسؤولية كبيرة متقدش عليها، لكن فالمقابل كشف أن كاينين باحثين كيشتغلو فجمعيات لحماية المستهلك يمكن يديرو بحال هذ الدراسات، غير وكان الجامعة كتبقى بعيدة عليها.
وأكد ان مختبرات الجامعة من مارس بقاو سادين بسبب جايحة كورونا، ومايمكنش الطلبة يديرو ابحاتهم فيها، وقبل مكان عندو حتى خبار على دراسة بحال هذي، لا هو لا العميد ديال الكلية.
