عفراء علوي محمدي- كود//
فيديو منتشر بشكل كبير على مواقع التواصل الاجتماعي، ديال لقاء كان فنواكشوط اجتمعو فيه خبراء فمجال الموروث الثقافي الشعبي من المغرب والجزائر وتونس وموريتانيا، ناقشو فيه إمكانية وضع ملف كسكسو المغاربي عند اليونسكو، باعتبارو من التراث العالمي.
بزاف دالنشطاء اللي تداولو هذ المقطع حساب ليهم أن هذ اللقاء جديد، فيحين هذ الجلسة تدارت شحال هذا، وتحديدا فشهر مارس 2019، الفكرة فاللول كانت من الجزائر للتعريف بمميزات هذ الوجبة وشنو مرتبط بيها من ثقافة وذاكرة وطقوس، من بعد المبادرة توسعات باش تشمل باقي بلدان المغرب العربي اللي كتتميز بإعداد هذ الوجبة.
وفتواصل “كود” مع واحد من الطباخين المعروفين على مآل ملف الكسكس، قال أنه ممكن هذ المشروع ما كملش، أو توقف، وماعندوش لحد الآن حتى معطيات بخصوصو، على اعتبار ان الطباخين ماشي بوحدهم اللي داخلين فهذ الملف، لكن كذلك بزاف ديال الأشخاص الآخرين اللي كيساهمو فإعداد مكونات الكسكس ومقاديرو.
وتكلم الطباخ على ملف الطنجية اللي مازال قيد الإعداد باش ترجع من التراث العالمي حتى هي لليونيسكو، وباش تتم حمايتها مستقبلا باعتبارها أكلة شعبية معروفة، وفنفس الوقت حاملة للموروث الثقافي المغربي الغني بشكل عام، والمراكشي على وجه الخصوص.
