كود كازا ///
اليوم كانت ندوة قدمات فيها ولاية امن الدار البيضاء الكبرى بمقرها بدية نتائج عملية “الايادي البيضاء” اللي كيشرف عليها شخصيا عبد اللطيف الحموشي المدير العام للامن الوطني وكيهتم ريسطورات لملايرية فكازا للي كتخالف القانون.
اليوم عرضو ويسكي وفودكا وانواع اخرى من الشراب المضروب والمغشوش.
لكن اهم ما لاحظته “كود” فهاد الندوة ماشي الشراب المضروب ووسائل التزوير والنصب على المواطن وعلى الجمارك وعلى الدولة كلها٬ بل شكون حضر ليها.
كنا قبل ايام هدرنا ان هاد الايادي البيضاء غادي يسالي بتسوماني على جميع اللي عندو شي علاقة بهاد المطاعم واللي كيحميهم او يدعمهم.
الندوة حضر ليها والي الامن الوردي اللي عطى توضيحات فتصريحات صحافية٬ وكان كذلك الناطق الرسمي باسم المديرية العامة للامن الوطني٬ عطى تصريحات وجا باش يبين ان القضية عندها اولوية عند المديرية. كان حاضر كذلك عزيز كمال الارديسي رئيس المصلحة الولائية للشرطة القضائية بالدار البيضاء. كيف عاينات “كود” كان حاضر كذلك امين الشكوندا.
لكن الغريب اللي لاحظاتو “كود” هو غياب وتهميش نائب والي امن الدار البيضاء حميد بحري وكذلك المراقبة العام نور الدين لكلاوي رئيس الاستعلامات العامة.
اكيد هاد الغياب عندو معنى.