عفراء علوي محمدي- كود//
قررات لجنة اليقظة فمقاطعة أكَدال الرياض فالرباط، تسد ليسي ديكارت، بسبب عدم احترامو للاجراءات الاحترازية للحد من انتشار فيروس كورونا المستجد.
اللجنة، المكونة من محمد الزين، رئيس مقاطعة أكَدال الرياض، ومحمد الدردور، مدير الأكاديمية الجهوية للتربية والتكوين الرباط سلا القنيطرة، سلمى بنمليح، طبيبة ممثلة لمندوبية الصحة فالمنطقة، شافت بأن التباعد الاجتماعي بين التلاميذ فالليسي مامحترمش، والبلاصة اللي كيتحركو فيها الأساتذة عامرة بالطوابل اللي فالاصل مخصصة لللتلاميذ.
كيف قالت اللجنة، فالنسخة ديال البروسي الخاص بإغلاق الليسي، اللي خصلات عليه “كود”، أن نتائج اختبار PCR للكشف على كورونا الخاص بحراس الليسي ماتقدماتش للجنة ف1 نونبر كيف كان من المفروض يكون، ووفق قرار صدر ف29 أكتوبر 2020، وهذشي كيطرح عدة تساؤلات على الحالة الصحية لهذ الحراس.
وكان سبق لليسي ديكات سد شي 14 ليوم فشهر شتنبر اللي فات، بعدما تسجلات إصابات فصفوف التلاميذ والأساتذة بفيروس كورونا.
