سهام البارودي//
من نهار الصديق سقراط بارطاجا معايا فيديوات الظابط الخراز وانا مبلية بيه و بليت بيه گاع الناس لي كانعرف ! حتى ولا الخراز جزء من الروتين ديالي و برنامج ضروري خاصني نشوفو كولا نهار مورا الخدمة ! ” واش تفرجتي فالخراز ؟” ” واش حطو الحلقة د اليوم ؟” “كي جاتك الحلقة د البارح؟” الخراز دخل لبيوت و قلوب بزاف د الناس صغار و كبار و من جميع الفئات الاجتماعية ! تقدر تتفرج فيه مع مراتك مع صاحبك مع مك و باك !
و فاش بديت كانتبعو و بالحدس ديالي عرفت انه العمل ديالو غادي يجبد عليه النحل و انه العفوية ديالو ماشي بزاف د الناس غادي يتقبلوها.
السيد كانشوفو انسان بسيط و القوة ديالو و الذكاء ديالو فديك البساطة لي كايتميز بيها ! مغربي من الجيل ديال الستينات و السبعينات ! جيل البصري و الحسن الثاني و دخل تخدم بالشهادة و هاكاك واخا المستوى التعليمي ديالو متواضع و ماعندوش “الماسطررر” و “ليصوونص” لي كايبجحو بيهم شي وحدين ولكن السيد قرا فاش كانت القراية د بصح و الاهم من هادشي عندو الخبرة د رجل د التيران رجل عندو تجربة كبيرة فالحياة ! و مغربي بگاع التناقضات لي فيه !
مايمكنش تحكم على الخراز بمعايير 2020 ! واخا گاع تبغي تحكم عليه ماغاتلقا فين تحطو اصلا ! دوك التيكيتات مايصلاحوش ليه ! مايمكنش تقول على الخراز ميزوجين مثلا و لا حداثي و لا اسلامي و لا يساري ! الخراز غي خراز و كفى ! غايبان ليك ميزوجين فاش غايهضر على العيالات و شوية غاتسمعو هوا نيت كايقوليك انا فرحان بزاف فاش كانشوف البنات البوليسيات! واحد الكوميسيرة كانت معانا واعرة ! وانا ماكانفهمش علاش مراتي و بناتي مايتبعونيش فالگنازة و دوك لي كايقولو المرأة عورة غي كايخربقو ….
و غاتقول عليه مسلم متدين حيت زعما حاج بيت الله و كايقول الاحاديث غالطين و كايآمن بالسحور و بلي العين و الجنون يقدرو يقتلو و شوية غاينقز يقوليك ” آ سيدي واش الله محتاج ليكم تجاهدو فبلاصتو ! لا آ خويا انا مايدوي معايا حد على الجهاد انا غي كانصلي و كانزكي باراكا” ” و التعدد خايب ماديروهش” و ” العيالات ماخاصهمش يولدو بزاف” و المزاليط مايولدوش گاع !
الخراز غير قابل للتصنيف ! فحال بزاف د الناس من الجيل ديالو ! الجيل د الواليدين ! جيل المتناقضات ! الجيل المغاربة ما قبل دمقرطة الگرصون
داكشي علاش وانا كانسمع ليه ماكانكعاش عليه ! واخا شي مرات يقدر يخربق و يقول شي افكار تتعارض تماما مع كيفاش كانفكر و لكن واش مطلوب منا نتافقو فكلشي ؟! طبعا لا !و كانبقا معجبة بطريقة السرد ديالو و كانشوف فيه مثال للرجل الناجح و للمتقاعد لي قدر انه يهرس ديك ليماج ديال المتقاعدين كناس ايناكتيف فالمجتمع كاياكلو القوت و يتسناو الموت !
المشكل لي عند سي الخراز هوا انه mal entouré ! الناس لي دايرين بيه عوالين على الموهبة ديالو فالسرد و داكشي لي عطاه الله و صافي ! عوالين عليه بوحدو باش ينجح البرنامج في حين السيد محتاج ناس فايقين و عايقين لي يعاونوه بالارشاد و يردوا معاه البال ! الخراز راه فحال شي لاعب كرة قدم واعر و عندو فرجلو و لكن خاصو فرقة مزيانة لي تعاونو باش يتألق! تيران مزيان ! اعداد بدني! ماكلة صحية … تداريب ! فرقة لي تعاونو فالبرنامج و لي تساعدو حتى فالتواصل مع السوشل ميديا حيت ماننساوش انه السيد ماشي من جيل السوشل ميديا و قوة الكومونطيرات و المكالمات و اللقاءات الصحفية راه غاتأثر ليه على حياتو و صحتو ! الخراز محتاج لشي ايكيب مزيانة و عندها تجربة!
راه مشاهير العالم و السياسيين الكبار فالعالم و اللعابة كلهم كاتلقا عندهم طاقم كايكوتشيهم و كايعاونهم فالتواصل باش يعاونهم مايديروش شي اخطاء لي تقدر تربك المسيرة ديالهم و لا شي مرات تكون اخطاء قاتلة لي تساليها!
و اخيرا غانختم بديك الاغنية ديال رجع رجع وا سي الخراز شي باس ماوقع! رجع رجع وا القنيطري شي باس ماوقع ! و دير غي جوج او ثلاتة د الحلقات فالسيمانة باراكا عليك و شوف شي ناس قافزين يخدمو معاك و يراجعو معاك الحلقات ! و حنا كانساينوك على احر من الجمر !
بيبا الخراز !
