عفراء علوي محمدي- كود//
بعد إدراج كسكسو والمهارات المرتبطة بإنتاجو وتحضيرو فلائحة التراث الثقافي غير المادي فاليونسكو، عبر الشيف موحا فضال على السعادة ديالو بهذ التتويج، ولو أن هذ الطبق اعتبرات اليونيسكو بقرارها أنه كيشتارك فيه المغرب والجزائر وتونس وموريتانيا، وهكذا تعطات ليه هوية مغاربية.
بالنسبة لموحا، هذا ماشي مشكل، وقال فتصريحو ل”كود” أن لوريجين دكسكسو أصلا من شمال إفريقيا، وأنه بالعكس، بهذ القرار الدول المغاربية غيديرو يد فيد، وغدي توقف المضاربة اللي نايضة بين البلدان المغاربية على الكسكس، ومايبقاش كل واحد فيهم يقول “ديالي ديالي”، على حساب كلامو.
وقال انه دابا كلشي غيكون فرحان وعلى خاطرو، “خاصنا كاملين نكونو فخورين بهذ القرار اللي ماغتبقاش معاه “أزمة الهوية”، بصراحة أنا ضد كل واحد ينسب الكسكس ليه بوحدو، لكن فالمقابل بغيت الكسكس المغربي هو اللي يتعرف كثر لانه هو المخير، والطبخ المغربي ولاكَاسترونومي المغربية يتضرب بيه المثل عالميا، وتعترف بيها اليونسكو، عوض غير كسكسو بوحدو”، كيف قال موحا.
وتابع، “لكن فالأصل راه كل بلاد والكسكس ديالها وباش كيتميز، تونس كيدار بالحوت، والجزائر بالدجاج والمركَاز، والمغرب فالأصل بلحم الحمل “لانيو” أو اللحم بصفة عامة، وموريتانيا بالكرشة، وبواحد الربيع اسمه “اللالو” ديال “السافانا””.
وأكد موحا أن أصل الكسكس من هذ البلدان بربعة، اللي هي اللي تقدمات بطلبات لليونيسكو باش حصلات على هذ القرار، ونفا نفيا قاطعا يكون فدول خرى، وإلا كيقول أنهم غيكونو نقلو من عندنا وتطفلو علينا.