كود الرباط//
وزير الصحة لي كيعرف يلعب بالأرقام، كيعيش أسوأ مراحلو خصوصا مع بدء المهمة الاستطلاعية حول الصفقات ديال الأدوية وكورونا، هاد المرة المهمة الاستطلاعية مشات بعيد وبدات بالتحقيق مع وزارة المالية باش تعرف كيفاش وفين مشاو فلوس هاد الصفقات.
وزير الصحة المعزول حتى داخل الحكومة، ماكيتفاهم لا مع رئيس الحكومة ولا مع وزراء آخرين، كيدير تصريحات بوحدو، كيبين بلي مكاينش تنسيق داخل الحكومة، وتلقى الاثنين لي فات ضربة موجعة من وزير الصناعة والتجارة حفيظ العلمي.
الوزير العلمي عطاه درس فالوطنية، وقاليه بشكل مباشر :”الحرب مخصهاش تكون فالداخل وخصها تكون مع الناس لي كنافسهم”. مؤكدا أن “المغرب قادر يفوت هادشي”.
وأكد مولاي حفيظ العلمي بلي المغرب كيصنع أجهزة تنفس أفضل مما نتصور، مضيفا :”الكيت لي كان كيجيب المغرب من الصين ديال التيست، ولينا نصنعوه فالمغرب ونبيعوه بأثمنة رخيصة”.
ماشي غير هادي باش كلاشا العلمي وزير الصحة، بل اضاف:”تيست pcr لي تفقد فالعالم ولينا نصنعوه وبثمن أرخص بدل نشريوه من الصين “.
وتساءل الوزير: “واش المغاربة قادين؟ راه قادين، وملي كنسمع بلي جهاز تنفس مقادينش عليه، كنقول قادين عليه ونفوتوه”.
وقال العلمي :”ملي كنبخسو العمل ديالنا، راه الخبير المغربي غايمشي لبرا ويخدم برا”.
هاد الكلام لي قال مولاي حفيظ العلمي، خلا البرلمانيين يصفقو عليه..
