كود كازا//
عشنا وشفنا حتى ولاو المتهمين بالاغتصاب يتضايفو ويتكرمو، بحيث الأسرة الحاكمة دالإمارات ما حشمات ما ستحيات تعرض هذ الأيام على المغني المغربي سعد المجرد، اللي تورط فبزاف دجرائم الاغتصاب والاعتداء الجنسي.
المجرد حط، فصفحتو ف”أنستكَرام”، كيبين فيها استقبالو فخيمة الشيخ محمد بن سلطان آل نهيان، كيف بان المجرد وآل نهيان ففيديو فرحانين وناشطين، وصرح المجرد انه كيوجد يغني بالإماراتية.
معلقين وحقوقيين عبرو على الغضب ديالهم فالتعليقات، وفتدوينات على مواقع التواصل الاجتماعي، قالو فيها أن هذشي غيزيد يفاقم آفة الاغتصاب ويشجع عليها، وأن الجلوس مع “مجرم” فنفس الطبلة فيه هدر لحقوق الضحايا، خصوصا وأن القضايا المرفوعة ضد المجرد مازالة فرداهات المحاكم.
https://www.instagram.com/p/CKGrUbEA0ft/
ومانساوش أن المجرد متابع من 2018 من طرف شابة على خلفية حادثة اغتصاب مفترضة وقعات فمدينة سان تروبي ففرانسا، كيف باقي المجرد متابع بدعوى اغتصاب رفعاتها ضدو فتاة فرنسية، بحيث اتهماتو بالاعتداء عليها فغرفة فأوطيل فباريس، ووجه إليه القضاء تهمة “الاغتصاب مع ظروف مشددة للعقوبة” ودخل الحبس حتى تعاود تطلق من جديد ف2017.
وماشي غير هذشي، بل كان المجرد تتابع بالاغتصاب فقضايا خرى وسلك منها، بحيث ف2017، شابة فرنسية من أصول مغربية دعات المجرد، وأكدات “أنه اعتدى عليها جنسيا وضربها فكازا ف2015′′، ومن بعد قررات الشابة تنسحب من الدعوى، وقبل هذشي كَاع، كان القضاء الأميركي وجه للمجرد تهمة الاغتصاب في واقعة كتعود لعام 2010، لكن الدعوى سقطات من بعد.
