كود كازا//
كشفات شركة “بيك”، فدراسة ليها، أن فترة الحجر الصحي فزمان كورونا دارت تغيرات كبيرة فسلوك الأطفال والمراهقين.
وقالت، بلغة الأرقام، أن أكثر من اثنين من كل ثلاثة آباء، اللي كيشكلو نسبة 70 فالمية، عندهم ولاد كيدوزو وقت اطول قدام الشاشات، سوا تيليفونات أو أيبادات او تلفزات، و6 فالمية فقط اللي كيخرجو يلعبو برا.
لكن للكونفينمون تأثير زوين فأمور أخرى، بحيث صرحو 17 فالمية من الآباء، حسب الدراسة نفسها، أن ولادهم ولاو يقراو كثر بعد الحجر، و31 فالمية ولاو يرسمو كثر، و25 كيلونو كثر.
وفحديثو على نتائج هذ الدراسة، قال تشيستر تويجز، مدير المبيعات العالمية ف”بيك”، أنه مزيان يدوزو الدراري اوقاتهم قدام ليزيكرون، لكن فالمقابل يديرو مجموعة من الأنشطة المهمة، باش يكتشفو إبداعاتهم، من خلال الكتابة والرسم والتلوين.
وقال أن الشركة غتاخد هذشي بعين الاعتبار باش تطور اللوازم المدرسية والأدوات الإبداعية، خصوصا وان الاطفال والآباء كيمثلو جزء مهم من الزبناء اللي كيشريو منتوجاتها.