محمد سقراط-كود///
الفصل 490 مديور باش يحرم حريث الفول على الحازقين خارج اطار الزواج، والحازقين هوما أكثر ناس كيتطبق عليهم وكيمشيو بيه للحبس، ومع ذلك هوما أكثر الناس ضد الغاء هاد الفصل، كاين شي مازوشية جماعية كثر من هادي، راه الأحياء الشعبية والسكن الإقتصادي وحتى الفئة المتوسطة فين كاين الزحام وستين واحد في العمارة . والسانديك داير فيها الخليفة عمر، وبنادم غير مستف مع الحيوط والبراهش كيتناقزو في الزنقة والعساسة ديال الليل والنهار،والربيعة لي كيشدو معاهم الليل بالجوانات، وبنادم شاداه الكبتة وقلة مايدار ومقابل غير الداخل والخارج، في هاد الأجواء فين كيعيطو الناس للبوليس وكيحضر وتلقى الجوقة في باب الدار أو العمارة، والمخزن خارج بالعشيقين والناس مستفين في الباب يسبو فيه، وتسمع شي مرة شارفة من اللور ” بغيتو تردو لينا العمارة بوسبير يالله سيرو الله يلكيها ليكم”.
شكون لي كيعاني من أزمة البرتوش راه ولاد وبنات الشعب المقودة عليهم، هادو لي عندهم فائض في المحاسيس كيخرجوه في تيك توك، أما المرفحين راه هاد الفصل ماواصلهم بوالو عايشين حياتهم في التيساع شي ماحاضي شي، راه تسكن في عمارة عالية الجودة كتلقى الى كثرات عشرة ديال الديور في العمارة واحد الربعة فيهم مسدودين والباقي تتلاقاه مرة في القرن فالسانسور، أما الإقتصادي راه العمارة ديما فيها الرجل خدامة بحال الى ساكن فالكورنيش، بنادم كثير والبز كثير والزحام وقوة الخيطي زيطي، طبعا الى شي بنت جابت صاحبها أو ولد جاب صاحبتو غادي يسوثليه الدرب كلو لخبار، ومع ذلك هادو هوما لي فين متهدر معاهم على شي حاجة ديال الحريات الفردية، كتسمع ديك حنا دولة إسلامية وهادشي فساد وحرام، حاكم على راسو بأنه عمرو يشوف الخير أو يستافد حتى هو من هاد الحريات وباغي يحرمها على كولشي.
حتى زعمة دوك الفاهمين الواعيين لي عندهم بروفايلات في فايسبوك فايتة عشرسنين، كيضحكو ويبخسو من النضال من أحل الغاء الفصل لي كيخلي الدولة تتدخل في حجر مواطنيها وشنو غادي يديرو بيه وفين، على أساس كاين ما هو أهم، والبلاد مشغولة مع كورونا والمغاربة ممساليينش لهاد القضايا، في الواقع راه ماشي ضروري أي مطلب نضالي يكون عليه اجماع جميع المغاربة وكيهمهم كذلك، من حق أي واحد يناضل من أجل باش كيآمن والحاجة لي باغي، وكل واحد يخوض معركتو على شكل أفراد أو جماعات، وحتى شي مطلب ماخاص يتبخس، راه يخرجو مثلا ناس كتطالب باش تنقص الضريبة على ايستيراد الكافيار، مامنحق تاحد يقوليهم راه الناس كتموت بالبرد في قرطخانة ونتومة باغين الكافيار يرخاص، هاكة باش المجتمع كيتطور ويتحدث هو بأن كل واحد يكونوا عندو معارك ويناضل من أجلها ماشي نبقاو نتسناو شكون لي غادي ياخد معركة جماعية من أجل جياع الوطن، بحال الى حنا راه باقين أقنان ديال القرون والوسط.
