علق عدلي القيعي وإبراهيم المنيسي مذيعا برنامج ملك وكتابة على تصريحات بكري سليم المدير التنفيذي لنادي هويدي "مصر للمقاصة سابقًا".
وصرح بكري سليم منذ أيام في حوار تلفزيوني له أن قيمة انتقال حسين الشحات من العين الإماراتي للنادي الأهلي قدرت بـ 185 مليون جنيه.
وعلق القيعي أمس الخميس من خلال شاشة قناة النادي الأهلي "عاوز أقولك والله براوة والله براوة، بسم الله ما شاء الله، استاذ بكري سليم انا بحبه بس هي وسعت منه".
وتابع "انا عاوز اسال الأستاذ بكري هو الدولار في نادي مصر للمقاصة بكام؟، حسب حسبتي فالدولار في النادي عندكم بـ 37 جنيه، وقت صفقة انتقال حسين الشحات كان بـ 16 أو 17".
وواصل "احنا دفعنا لنادي العين الإماراتي دفعنا 5 مليون دولار، يعني حوالي 80 مليون جنيه، أستاذ بكري حاول ياخد قرشين زيادة من العين الإماراتي حسبلهم الدولار بـ37 جنيه ف قالهم الـ 5 مليون دولار يبقوا بـ 185 مليون جنيه وأخد نسبته".
وأضاف "تحدث بالدولار عندما ذكر قيمة انتقال الشحات من المقاصة للعين، وتحدث بالجنيه المصري عندما ذكر قيمة انتقاله من العين للأهلي، المفترض يكون العكس".
وأردف القيعي "قولي ازاي حسبت الدولار بـ 37 جنيه بدل 16 جنيه علشان نيجي نتعلم منكم، ده تنويم مغناطيسي؟".
ومن جانبه علق ابراهيم المنيسي "بص يا استاذ بكري، الي هقوله ده على لسان أمير توفيق مدير التعاقدات في الأهلي، الي هقوله ده كلام رسمي ولو عندك عكسه طلع ما يثبت، الأهلي اشترى الشحات بـ 5 مليون دولار".
وأكمل القيعي "احسب بقى الـ 5 مليون دولار دول زي ما انت عاوز، احنا دفعنا المبلغ ده لنادي العين الإماراتي".
وتابع المنيسي تصريحاته "انت مش بتتكلم في مليون فرق او 2 مليون، انت بتتكلم في الضعف تقريبًا، من فضلك اثبت العكس بأوراقك التي تملكها".
واختتم عدلي القيعي تصريحاته قائلًا "العين بدأ مفاوضاته مع الأهلي بـ 8 مليون، وبعدين وصلت لـ 6 ووقفت الصفقة واحنا وقفنا عند 4 وفي الآخر وصلنا لـ 5 مليون واللاعب اتنازل عن بعض المكافات".
