كود احمد الطيب الرباط ////
غريب هاد الشي اللي وقع هاد العشية. مايسة سلامة الناجي دارت لايڤ شافوه الناس بزاف وبعد ايام خرجات هاد الساعة اشاعة اعتقالها. “كود” اتصلات بيها وحتى هي تفاجئات بهاد الاعتقال. مايسة قالت ل”كود” “كنت كالسة فداري مع راسي٬ كنتفرج فالتلفزة حتى لقبيت راسي مشدودة. عرفت بهاد لخبار من شي صحابي كيتاصلو بي يطمئنو علي”.
بالنسبة لسلامة الناجي فتصريحها ل”كود” فاللي طلق هاد الاشاعة “معروفين” و”غير براهش كيلعبو”. وفسؤال ل”كود” على سباب هاد الفعل المبرهش ردت مايسة “باغيين يبثو الخوف فنفوس لمغاربة. باش حتى حد ما يبقى يهدر ولا ينتاقد ولا يعبر عن رايو. باغيين كلشي يسكت”.
مايسة قالت ل”كود” باللي هي عارفة باللي هاد الاشاعة ما عند الدولة بها علاقة “انا عارفة ماشي الفوق. ماشي الدولة اللي ورا هاد التبرهيش. طناش لعام وانا كتكتب وفاحترام الواجب لجميع المؤسسات وغادي نستمر فالانتقاد والتعبير عن ارائي فظل الاحترام الواجب وما غاديش نخاف”.
