سعيد الشاوي كود كازا//
تعقيباً على ما تم نشره مؤخراً ف”كود” بخصوص الأجواء داخل مديرية الأخبار بالقناة الثانية (2M) من معطيات٬ قال صحافيون لـ”كود” أن قسم التحرير بأقسامه الثلاثة ما عمرو عرف شي اجواء مهنية وانسانية فيها الاحترام والخدمة بحال هاد ليام.
مصادر “كود” قالت بللي هاد الاجواء الايجابية كتبان للمشاهدين. فصحافيو وتقنيو القناة، تفيد المصادر، دايرة مواكبة مهنية للجايحة وتداعياتها. فكاع نشراتها 3 : الامازيغية والعربية والفرنسية محركة، ولمغاربة كيتابعوها ونسب المشاهدة العالية كتأكد هاد الشي.
المصادر اكدت لـ”كود” حوايج اخرى كيقولو كانت قبل وما بقاتش دابا “ولينا خدامين فاجواء خالية من الاستبداد والتخويف والتهديد بالعقوبات اللي كانت فعهد سميرة سيطايل اللي بقات 20 عام.
هاد المصادر هدرات على مصادر اخرى فالقناة كانت قالت باللي حميد ساعدني اللي مكلف بمديرية الاخبار ما فيديوش، اذ اوضحت لـ”كود” انو “مللي مشات سيطايل وخدات معاها نص مليار=ديبار فولونتير وهذا حقها، يلعب ساعدني دور فتكريس جو مهني وإنساني داخل المديرية.
المصادر قالت لـ”كود” باللي رجع الإعتبار المهني للصحافيين الذين صمدو فوجه سيطايل وسطوتها. المصادر قالت باللي ساعدني كيدافع مع المدير العام سليم الشيخ على مهنيين ومهنيات…
كما اوضح ان هنا تقويم لخطأ سابق تحولات فيه مديرية الاخبار من 2006 لمكتب ينافس دور الإدارة العامة للوكالة الوطنية لإنعاش التشغيل والكفاءات (ANAPEC)، اللي خدمات وحدين جابتهم من فرانسا فالقسم الفرنسي براتب طالع وتكرفصات على القسم العربي وصحافييه.
واعاد المصدر التأكيد انو لحد الان حميد ساعدني اللي من الجيل المهني الاول المؤسس للقناة داير خدمتو.
للاشارة هادي وجهة نظر صحافيين فالقناة. كاينة وجهة نظر اخرى معارضة ليها كنا نشرناها ف”كود”.
