نجوى المالحي – كود //
المغني المغربي سعد لمجرد فعلا ما بقاش عندو علاش يحشم، قالك بغا يسجل الأغاني الدينية والآذان بصوتو ويخلّيه صدقة جارية عليه.
سعد لمجرد لي غارق حتى للوذنين في قضايا الاعتداء الجنسي، وباقي ما فك حتى حريرتو مع القضاء الفرنسي قال انه غادي يعطي الآذان للقنوات فابور وما غاديش يتخلص فيه، بحال الا هو “النقشبندي” والناس واقفة عليه.
هادشي لي دار سعد لمجرد، ولي علن عليه في قناة إماراتية، الدولة الوحيدة لي باقة كتقبل عليه، سميتو “دغدغة المشاعر” ديال الناس، لّي للأسف كيتأثرو بأي حاجة فيها القرآن والدين واخا وراها شخص متهم ماشي مرة ماشي جوج بالاغتصاب.
في هاد الساعة الصدقة الوحيدة لي يقدر يدير لمجرد هي يمشي يجيب براءتو من القضايا لي متابع فيها، عاد ممكن يتصالح مع الرأي العام، أما حتى جمهورو فتابعين جيلالة بالنافخ وصافي.
