أحمد موسى عن حادث الدائري الأوسطي: "ربنا لطف بينا النهاردة"
أحمد موسى عن حادث الدائري الأوسطي: "ربنا لطف بينا النهاردة"
علق الإعلامي أحمد موسى؛ على حادث الطريق الدائري الأوسطي والذي أسفر عن تفحم 10 سيارات ما بين ملاكي ونقل بالإضافة لإحدى سيارات النقل الثقيل التي تسببت في الحادث.
وقال موسى في مداخلة هاتفية لبرنامج "صالة التحرير" المذاع على قناة "صدى البلد": "النهاردة على الطريق الدائري الأوسطي حادث كبير وأنا بعدي عليه كل يوم وعدينا على الحادث وشوفت الحادث عربيات 11 عربية بين نقل وملاكي".
وأضاف: "الطريق الدائري الأوسطي تقريبا يوم والتاني حادث وكان في منطقة قفلوها واتعمل فيها إصلاحات؛ عربيات النقل على الطريق سرعات غير محددة بتجري كيفما شاءت عربيات طولها 20 متر وبتجري".
وتابع: "واحدة من العربيات دي طلعت على عربية نقل بطالب الجهات المعنية أن هذا الطريق مغري للجري؛ هو أنا بعمل طرق عشان الناس تجري؟ النهار بقي مخيف والنقل بيمشي على هذا الطريق بيدمر؛ المشهد بتاع الحادث نتيجة عربية نقل بتجري وتخبط ولا ليه علاقة بأي حد ولا ليه علاقة بالحارات؛ بيمشي كيفما شاء وبيعملوا غرز شمال ويمين".
وأوضح: "الطريق دة محتاج أن يكون في تمركزات أمنية ودا محتاجه بالنهار على الطريق الدائري الأوسطي يكون في ردع للعربيات النقل ومينفعش أسيبه يسير كما يشاء وبطالب الإدارة العامة للمرور نزلوا حملات على الطريق هتلاقوا ناس واخدة مخدرات".
وأكمل: "أنا بشوف ناس بتبقي سايقة بشكل مش طبيعي وأحيانا ببقي عايز أفتح زجاج العربية وأقولهم براحة أنتوا بتموتوا الناس ليه؟".
واختتم: "رجال الحماية المدنية الناس نزلوا جري ومساعد وزير الداخلية كان موجود النهاردة؛ وفي عندنا وفيات وإصابات والنقل دهس العربيات الملاكي وربنا لطف بينا النهاردة أن مفيش ضحايا كتير".
