#بنتكلم_مصري
#بنتكلم_مصري
البوستات أو المقالات اللي فاتت معظمها بيدور حوالين العنوان ده!
إن كلام المصريين الحالي مجرد امتداد لمراحل اللغة المصرية, بنفس طريقة النحو والصرف والألفاظ والأصوات والعادات اللغوية.
يعني المصريين دلوقتي بيتكلمو لغوة مصري, واللغوة دي لها لهجات, صعيدي وفيومي وبحراوي وشرقاوي واسكندراني ودمياطي ..لخ!
أما عن أسباب اختلاف اللهجات فـ اللغة المصرية الواحدة بين الأماكن, فـ اسمحولي أرشح لكم كتاب عظيم تقدرو تاخدو فيه جولة لغوية مع مخطوطة “معجم اللغة المصرية القديمة” – أحمد كمال باشا- باللغة الفرنساوي, وتعليقاته بخط إيده بالحرف العربي, هنلاقي آلاف الألفاظ من كلامنا الحالي بجدور من مرحلة الحرف الهيروجليفي.
وكمان فـ الجزء 23 من مخطوطة المعجم ده فيه هامش بيبين حالات التصريف بالإبدال (شقلبة) لحرف الألف وصوت الهمزة مع اليه والواو والهه والعين والجيم والقاف:
الهمزة واليه: ألملم/ يلملم – أرقان/ يرقان
الهمزة مع الواو: أكدت/ وكدت – أشاح/ وشاح
الهمزة مع الهه: أيا/ هيا – أراق الماء/ هراق الماء
الهمزة مع العين: أديته/ أعديته – عباب/ إياب
الهمزة مع الجيم: أصيص/ جصيص
الهمزة مع القاف: أقول/ أأول – قلل/ ألل – أوي/ قوي
التصريف بالشقلبة أو اللخفنة أو مع البوادي والنواهي ..لخ هوه السبب فـ اختلاف اللهجات, إنما النحو الواحد وجدور الألفاظ هوما اللي بيحفظو حدود اللغة, يعني كلنا من قبلي وبحري بنتكلم لغوة مصري واحدة بلهجات طبيعية بعدد المدن والحتت والكفور والنجوع والعزب!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.
