محمد صلاح: قراراتي كلها للكرة ودايما أخاف على أكل عيشي
محمد صلاح: قراراتي كلها للكرة ودايما أخاف على أكل عيشي
أكد محمد صلاح؛ نجم ليفربول الإنجليزي؛ أنه وضع هدفا أمامه منذ بدأ ممارسة كرة القدم لافتا أنه كان دائم التركيز على عمله ودائما ما كان يتجنب الأخطاء.
وقال صلاح في مقابلة مع برنامج "صاحبة السعادة" المذاع على قناة "دي أم سي": "أنا دايما أخاف على أكل عيشي بدور على كل حاجة عشان أبقي لاعب كرة دايما كنت بتجنب الغلط؛ حياتي كلها مبنية للكورة وبحاول أعمل كل حاجة عشان أوصل للهدف".
وأضاف: "قراراتي معظمها للكورة بس وعايز أعمل كل حاجة تخليني أوصل لأني أكون لاعيب كورة كويس؛ لما كان عندي 14 سنة ورحت أعيش في القاهرة كان هدفي معملش أي حاجة غلط عشان أبقى لاعيب كورة كويس".
وتابع: "كنت بشوف لاعيبة كويسة ومواهب أحسن مني وكنت بشوف خوفهم على التمرين مش قوي؛ كنت بقول لنفسي هما ازاي ممكن يوصلوا للفريق الأول وحتى لو موهبتهم كويسة".
وأوضح: "أنا كملت لمرحلة كبيرة وفي ناس مواهب أحسن كموهبة لكن عقليتهم نفسها مختلفة؛ بيبقي عارف أنه لاعيب كويس يروح التمرين أو ميروحش يتخانق مع مدرب".
وأكمل: "أنا شفت لاعيبة من أقرب صحابي بيتخانق مع مدرب وأنا مليش دعوة؛ أنا مش فاهم اللاعيب وهو صغير بيبقي فاهم أنه أحسن من المدرب ازاي".
وواصل: "لحد دلوقتي الحاجة اللي بشوف أنها لازم تتغير في مصر أن المدرب واللاعب لازم يبقي بينهم علاقة مش شرط أنه يبقي المدرس بتاعك ويضربك؛ لازم يكون في كلام؛ المدرب في مصر بيقولك شمال أو يمين ولازم تنفذ".
واختتم: "احنا في مصر بنطلع عندنا خوف من المدربين وأحيانا بيقلب الناحية التانية ويقول مش هسمعلك بس لو في اتصال بين المدرب واللاعب ممكن يطلع حاجة كويسة".
