قالت الفنانة نجوى فؤاد، إنها تعاني من انزلاق غضروفي وتخضع لعلاج طبيعي مكثف، مضيفة أنها تتحرك الآن ببطء بسبب المرض ولا تستطيع الخروج من المنزل قائلة" الدكتور منعني من الخروج وعندي بنتين بيساعدوني"
وأضافت في مداخلة هاتفية مع تليفزيون اليوم السابع، : محدش بيسأل عنى واللى كانوا بيكلمونى دلال وسمير وماتوا، ودي أول مرة يحصلي والتعب دا رغم إني لا مارست رياضة ولا عملت حاجة غلط وبقول الحمد لله .
وتابعت : بقالي 6 سنين معتبتش استوديو وبلوم وزارة الثقافة لأن فيه ناس كتير زيي قاعدين من غير شغل ، وأنا سبت الرقص الاستعراضي من 17 سنة وأنا عضو عامل في الفن والمفروض أشتغل علشان أقدر أعيش ومحدش بيعولني غير ربنا .
في سياق متصل قالت : أنا إنسانة كنت بنتج وأنتجت 7 أفلام وكل لما أكلم أشرف زكي على شغل يقول "ده سوق عرض وطلب".
وقالت : فلوسي كلها ضيعتها على الإنتاج والاستعراض وعملت أدوار ليها بصمة زي "خالتي فوزية" والدولة قدرتني بجائزة تشجيعية.
وقالت : في الأزمة اللي أنا فيها المادية واللي ناس كتير فيها بلوم زملائي اللي بيشتغلوا يقفوا جنبي زي ما كنا بنعمل زي زمان.
في سياق متصل قالت : كنت قريبة أوي من دلال عبدالعزيز وسمير غانم وماتوا ودلوقتي القريب ليا واللي بيسأل عليا نبيلة عبيد .
وتحدثت عن أن الجمهور يسأل عليها قائلاً: الناس بيتصلوا على البيت ويقولولي إنتي فين بقولهم الأدوار بس مش مناسبة.
وقالت المهرجانات مش بيبعتولي دعوة غير مهرجان الدولة اللي لسة بيبعتلي بس مروحتش بسبب التعب.
وقالت : أنا بقول لوزارة الثقافة والنقيب اسأل عليا ، وأنا كنت عايزة أروح أبوس إيده لما دفن هيثم أحمد زكي كانت لافتة عظيمة له وكلمته شكرته .
في سياق متصل قالت : أنا مش عايزة أمثل دور فتاة الجامعة ولا سندريلا أنا عايزة أمثل الدور بتاعي وفيه كتير بيعملوه والواحدة بتعمل 3 و4 مسلسلات .
وقالت : الجمهور وحشني ، ونسيت التمثيل حرام عليهم جنزرت مينفعش كدا العمر بيضيع والأيام بتجري .
