الداعية الجديد.. كيف أثار علي غزلان حفيظة رواد السوشيال ميديا؟
الداعية الجديد.. كيف أثار علي غزلان حفيظة رواد السوشيال ميديا؟
كشف البلوجر علي غزلان عن تفاصيل زيارته إلى ملاجئ إفريقيا وذلك في منشور عبر حسابه على فيسبوك.
وقال غزلان: "كنت أري فيديوهات للمواطنين في مالاوي بإفريقيا، لكن قد اكتشفت أن الحقيقة غير ذلك.. هؤلاء تحت خط الفقر".
أضاف غزلان:"أبسط حقوقهم في الميّه مش موجودة عشان يشربوا ميه.. بيمشوا مسافات بعيدة وبيتجمعوا عند بركة ميّه مليانة تراب وطين وأمراض وحشرات وبيعبّوا منها الميه ويرجعوا للقرية بتاعتهم يشربوا ويطبخوا ويغسلوا بالميه دي عشان كده امراض زي الملاريا والحمى الصفراء منتشرة جدًا عندهم.. عايشين في بيوت غير آدمية، مفيش غير أكلة واحدة بياكلوها اسمها (سيما)، ودي عبارة عن قمح مطحون جوه ميه مغلية".
وواصل:"بلدك أولى بيك وكل حاجة.. بس حاول تخصص جزء من صدقتك أو زكاتك للناس دول .. أنا مش عارف إزاي قادرين يستحملوا يعيشوا كده!! ربنا يعينهم ويراضيهم يا رب.. عشان كده أهل الخير كتير .. وفي ناس كتير بيتبرعوا ليهم ويعملولهم آبار عشان يشربوا ميه نضيفة كويسة .. وناس بتتبرع وتديهم أكل ولحمة .. جزاهم الله كل خير .. مبسوط أني سبب ولو صغير من اسباب أن الناس دي تعيش حياة كريمة.. الفترة دي هنفتحلهم أكتر من ١٠ آبار في ١٠ قرى مختلفة.. وربنا يقدرنا ونوفر لهم أبسط السُبل عشان يعيشوا حياة كريمة".
واختتم غزلان منشوره قائلًا:"نقول الحمد لله على كل النعم.. نعمه إنك تفتح الحنفية تلاقي ميه .. أو نعمة إنك تروح السوبر ماركت وتلاقي ميه ..الناس دي مش لاقية الميه .. ولما بتلاقيها ربنا يتولاهم من الأمراض وعدم النضافة اللي موجود فيها ".
وفور نشر علي غزلان عن زيارته لملاوي وقوله إنه ينشر الإسلام هناك، سخر عدد كبير من رواد السوشيال ميديا منه، واصفين إياه بـ"الداعية علي غزلان"، وهو ما قوبل بالرفض من البلوجر الشهير الذي قال لأحد متابعيه تعليقا على السخرية منه: "أنا خصيمك يوم الدين".
