تامر أمين يسخر من إيهاب جلال: "بيقاوم الضغط بالكركديه"
تامر أمين يسخر من إيهاب جلال: "بيقاوم الضغط بالكركديه"
هاجم الإعلامي تامر أمين؛ عدد من لاعبي المنتخب الوطني بعد الخسارة أمام إثيوبيا لافتا أنهم لا يستحقون ارتداء قميص المنتخب الوطني.
وقال أمين خلال برنامج "أخر النهار" المذاع على قناة "النهار": "بصراحة في لاعيبة مينفعش تلبس تشيرت المنتخب؛ ميزعلوش مني يعني؛ محمود علاء وأيمن أشرف وعمر جابر مينفعش يلبسوا تشيرت المنتخب؛ ومرموش لحد دلوقت مينفعش يلبس تشيرت المنتخب ومصطفى محمد مينفعش يلبس تشيرت المنتخب".
وأضاف: "الحمد لله أن محمد صلاح ملعبش؛ عشان اسمه وسمعته؛ الحاجة اللي بنتباهي بيها قدام العالم مكانش ينفع تتلطش التلطيش اللي حصل دة".
وتابع: "أنا عارف أن من الظلم الحكم على مدير فني بعد مباراتين بس ولكن في حاجة أسمها الجواب بيبان من عنوانه؛ وفي حاجة اسمها أديني أمارة؛ أديني جملة أديني تحركات أديني ضغط".
وأكمل: "لاعيبة إثيوبيا بيضغطوا علينا وكابتن إيهاب جلال بيقاوم الضغط بالكاركديه الظاهر كدة عشان ينزل الضغط؛ مفيش أي جمل ومفيش حاجة خالص؛ 45 دقيقة إيهاب واقف بيتفرج مش شوارع دا مطارات وفسح".
واختتم: "قراءة المباراة سيئة والتحضير سيء؛ أنتوا متخيلين أني معرفش جول أثيوبيا كان لابس إيه؟ والله ما ببالغ اللي فيكم سمع أسم جول إثيوبيا يقولي".
