محمد الباز يطالب الخطيب بالاستقالة: "الأهلي بقي عزبة ملهاش صاحب"
محمد الباز يطالب الخطيب بالاستقالة: "الأهلي بقي عزبة ملهاش صاحب"
أكد الإعلامي محمد الباز؛ أن الزمالك حقق فوزًا مستحقًا على الأهلي في نهائي بطولة كأس مصر، مشيرا إلى أن نتيجة المباراة كادت أن تصبح أكبر.
وقال الباز خلال برنامج "أخر النهار" المذاع على قناة "النهار": "جمهور الأهلي لما كان فريقه بيخسر كان بيبقي متفهم ومساند لكن جمهور شايف أن ما يجري في النادي يصل إلى درجة الفساد؛ فساد إداري أو رياضي أو يصل إلى فساد مالي".
وأضاف: "ما يحدث في الأهلي يصل لدرجة الفساد؛ جمهور الأهلي نفسه مستاء؛ أنت بتتكلم عن حاجة في الأهلي لازم نشاور عليها؛ كابتن الخطيب راجل ممكن يبقي رمز في الكرة المصرية لكن في الإدارة زي الزفت؛ ضيع النادي الأهلي".
وتابع: "الخطيب راجل خلوق وطيب وفي جوة مجلس إدارة الأهلي مراكز قوي وخلافات والخلافات بدأت تظهر وبقي في خلافات وتحزبات داخل اللاعيبة والأهلي بقي عزبة ملهاش صاحب واللي عايز يعمل حاجة بيعملها".
وأكمل: "في دور خطير جدا بيلعبه المدعو علاء صادق؛ قاعد يعيش الأهلي وجمهوره أن النادي عليه مؤامرة وأن الناس عايزة تنقض عليه وتنهيه؛ ومعظم المعلومات اللي بيحصل عليها من أعضاء داخل مجلس إدارة النادي الأهلي".
وأوضح: "أنت بتتكلم على مجلس إدارة النهاردة لو الناس دي بتحب الأهلي لازم تستقيل على رأسهم الخطيب وتيجي ناس بتحب النادي وهو يقول أنا فشلت أنا حاولت ومعرفتش؛ في ناس كانت هتموت أمبارح مش عشان النادي خسر ولكن خسر بفضيحة".
وواصل: "مين اللي جاب المدرب دة والا مشي موسيماني أصلا؟ الراجل كان تايه في الملعب في إصرار على ترديد اسم حسام غالي واصراره أن محمد هاني يلعب".
واختتم: "أنا بدعو إلى ثورة إدارية في النادي الأهلي عشان يتم تغيير حقيقي عشان النادي دة يرجع وتبقى المنافسة كويسة".
