حرف الحه, هوه الحرف اللي بيفتح الكلام, ومن ضمن معانيه –لوحده كده- الفتح والتبشير!
عشان كده اتكونت منه مصطلحات كتير, زاي تصاريف الحاصل والمحصلة والمحصول .. كلهم نتيجة دمج أداة التباشير “حا” + الفعل/ الحدث “سر”, بالتصريف بتتشقلب الره مع اللام, وتتشقلب السين مع الصاد, تبقا “حا” + صل” = حاصل, يعني بداية الفعل/ الحدوث/ الفاعلية .. لخ!
أفكركو بس بأدوات التباشير, اللي سبق واتكلمنا عنها, ومشروحة فـ كتاب “بنتكلم_مصري” القاعدة رقم (132) صفحة (139), اللي هيه عبارة عن تلات حروف من نفس المخرج الصوتي: ع + ح + هـ
• عاكتب/ عاشرب/ عالعب
• حاكتب/ حاشرب/ حالعب
• هاكتب/ هاشرب/ هالعب
بالتبادل بين التلات حروف دول, اللي لازم نتعامل معاهم كأنهم حرف واحد, لأن أصواتهم بتطلع من حتة واحدة, بنفس التأثير والوظيفة, والفرق بس فـ العادات اللغوية اللي بتتشكل نتيجة اختلاف الزمان والمكان والطقس والجينات وكل عوامل التأثير!
حسب قواعد النحو العربي اسمهم “أدوات الإستقبال”, وحسب قواعد النحو المصري الحالي اسمهم “أدوات التباشير”, والأدق لو نعتبرهم: “مفاتيح الكلام”!
………….
المصري القديم عبر عن حرف الحه, بصورة الحبل, لأنه رباط بيربط الكلام, انما كتير أوي نلاقيه بيرجع الحه لوظيفتها الأساسية فـ فتح أو افتتاح الكلام, برمز بوكيه الورد, اللي هوه مش مجرد ربط, إنما وصال ومحبة!
• حاضر .. حا + در (ضر) = جواب فوري/ سرعة الرد (الحضور)
• حاسـب .. حا + سب (سيب) = تنبيه/ تحذير (الحساب والمحاسبة لهم جدر تاني)!
• حامــل .. حا +مر (مل) = بشارة الحب/ نتيجة الحب
…………
كل حرف فـ اللغة المصرية, كان له لمسة, وله معنا, وله فلسفة, مش مجرد حرف بيعبر عن صوت وبس!
كل جدر مصري قديم, اتصرف واتحور بعشرات التصاريف والتحاوير, فـ كلامنا الحالي وكلام غيرنا!
عشان كده لازم كلنا نهتم بـ #دراسات_الهوية المصرية
وعشان كده لازم كلنا نحاول ونساعد وندعم #تدريس_اللغوة_المصري
الإستعداد للمستقبل بكل أدوات العلم والتكنولوجيا كويس أوي ومطلوب أوي أوي, بس الأساس بيبدأ من الهوية!
تدريس ملخص عن مراحل تطور اللغة المصرية من أقدم مراحلها لغاية المرحلة الحالية!
تدريس ملخص تطور حروف الكتابة المصرية, ودلايل وجودها فـ حروف الكتابة الإنجليزي والعربي وغيرهم!
مطلوب مقرر دراسي وطني, يعالج أمراض شيزوفرينيا الهوية!
صوت الحه الفتح والمفتاح, ودراسات الهوية المصرية فتح الفتوح!

ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.