أحمد موسى يهاجم الحركة المدنية: يحاولون فرض شروطهم على الحوار الوطني
أحمد موسى يهاجم الحركة المدنية: يحاولون فرض شروطهم على الحوار الوطني
هاجم الإعلامي أحمد موسى؛ أحزاب الحركة المدنية مشيرا إلى أنهم يحاولون فرض شروطهم على الحوار الوطني رغم عدم تواجدهم في الشارع.
وقال موسى خلال برنامج "على مسؤوليتي" المذاع على قناة "صدى البلد": "سيادة الرئيس دعا لحوار وطني؛ شيء عظيم حد اختلف على دة أبدا؛ كل شوية الاخوة في الحركة المدنية بيانات ومطالب وشروط وكأن الحوار دة معمول عشان أخواتنا في الحركة المدنية اللي هو سيادتك كمواطن متعرفش مين هم".
وأضاف: "مين بيمثلوا كام واحد في البلد؟ مين أرضيتكوا ايه؛ عايز واحد في الحركة المدنية يقولنا أحنا عندنا مليون واحد في الشارع؛ انت ليك تمثيل فين؟ أنتوا مين ياسيدي اطلع قول أنا سين وصاد وعين".
وتابع: "هو أنت فاكر نفسك المعارضة الوحيدة في مصر؟ طيب حزب الوفد فين حزب التجمع ليه هو ليه حضرتك عايز تبقى فوق الحوار الوطني هي البلد دي مفيهاش حد غيرك".
وواصل: "قدرتك اية في الشارع؟ وريني نفسك؛ طلبات وشروط أكتر من وجودك هو ليه عايز تفرض نفسك على كل حاجة؛ طيب الوفد يقولك أيه أقدم حزب عريق في مصر؛ أنت بتخوفنا بتهددنا بتهدد البلد؟ عايز الحركة المدنية يطلعوا يقولوا احنا مين قوتك ايه في الشارع؟ ليه بتتشرط ومفيش حاجة عاجباك".
وأكمل: "هاتلنا من الاخر الحوار الوطني مستمر والحوار الوطني ليس الحركة المدنية والحوار الوطني لكل المصريين والمعارضة الشريفة النزيهة اللي مش عايزة تفرض شروطها على البلد؛ ياجماعة أرحموا نفسكم داحنا قبلنا ومع بعض وقدم السبت والحد عايزني أعمل ايه تاني".
وأوضح: "أنت من الأخر عايز ايه أديني أمارة بحجمك أنتوا واخدين أكتر من حجمكم والله؛ دانتوا كلها حزبين أوضتين وصالة دا في أحزاب مش موجودة غير على الورق؛ أنا عارف كل واحد فيكم من أولك لأخر والأحزاب دي كلها عارفينها؛ مع احترامي للكل بس أنا حكاية الشروط والطلبات والأوامر مش عجباني".
واختتم: "المواطن كره حاجة اسمها حركة مدينة؛ هما مين دول يعني ليه الضغوط دي عشان أيه من الأخر؛ عشان أنت سيد الشارع؟ لا والله أنا اللي عارف قوتك ومن الأخر براحة يا جماعة كل واحد يعرف وزنه كام ووزنه ايه".
