إبراهيم عيسى: المحليات كارثة سودة والفساد فيها في الركب
إبراهيم عيسى: المحليات كارثة سودة والفساد فيها في الركب
أكد الإعلامي إبراهيم عيسى أن طريقة اختيار المحافظين ورؤساء المدن والأحياء خاطئة مشيرا إلى أن المحليات تمر بأزمات كبيرة أدت لانهيارها.
وقال عيسى خلال برنامج "حديث القاهرة" المذاع على قناة "القاهرة والناس": "لا مستعجل على حركة المحافظين ولا أمل منها كثيرا ولا أتصور أنها مفتاح للعمل في مصر ولكن للأمر أهمية التوقف عنده في منهج اختيار المحافظين".
وأضاف: "عايز أشوف نفسي أحلم كمواطن مصري باختيار المحافظين على غير المنهج السقيم اللي بيحصل تقريبا من 1955 وخلينا نوصل لحقائق الأول ونقول هل هي حقائق تشبه البديهيات أم هي تأول مني".
وتابع: "مصر عندها مشكلة رهيبة في الحكم المحلي ومصر فيها فساد للركب في المحليات ومصر فيها أزمات هائلة في الإدارة المحلية لو انت مش حاسس معايا بده أنه واقع خلاص تجاهل اللي هقوله بعد كدة ولو أنت شايف أن المحليات في مصر كارثة سودة وملبئة بالفساد تعالي بقي نتكلم عن الحكم المحلي".
وأكمل: "المحافظين على رأي المحليات وبعد كدة رؤساء الأحياء والمراكز ورؤساء الأحياء في المدن؛ معندناش انتخابات المحليات وقانون الإدارة المحلية معطل ومرمي في ملفات البرلمان ويبدو أن الأجهزة الأمنية أو أي حد من صناع القرار ليه رأي في موضوع الإدارة المحلية دة".
وأوضح: "مصر مفيهاش مجالس محلية منتخبة من سنة 2010 يعني أخر انتخابات وبعدين جه 2011 بقالنا 11 سنة مفيش حد بيحاسب محافظ فيكي يا مصر وحتى الفتات اللي فضل في القدرة على محاسبة المحليات مفيش".
واختتم: "دا كله راكم الأزمات جوة المحليات ومهما بذلت من قدرة ومهما كانت التعليمات ومهما كانت الأوامر ولا أي حاجة هتنفع في مواجهة غول المحليات بكل بيروقرطيته وبكل فساده".
