كشف محمد بركات عضو مجلس إدارة الاتحاد المصري لكرة القدم عن حقيقة المشاجرة بينه وبين عدد من أعضاء الاتحاد بسبب استمرار عصام عبد الفتاح في منصب رئيس لجنة الحكام.
وقال بركات خلال حديثه عبر قناة القاهرة والناس: "هي مش مشاجرة.. كان النادي الأهلي بيلعب على بطولة الدوري وفي تنافس بينه وبين الزمالك وده وضع طبيعي وكان حصلت بعض الأخطاء التحكيمية".
وأضاف: "على سبيل المثال في ماتش الأهلي والبنك الأهلي رامي ربيعة لعب الفاول على طول والكرة بتتحرك والحكم وافق على ان الكرة تكمل وانتهت الهجمة بهدف للأهلي ساعتها الحكم رجع للفار وشاف ان الكرة مكانتش ثابتة على الأرض ولغى الهدف دي مش من ضمن الحالات اللي الفار يرجع فيها الكورة مادام الحكم شاف الكرة قدامه وسمح باستئناف اللعب وانتهت بجول يبقى خلاص الكرة جول وده كان رأيي في البرنامج وفي نفس التوقيت كان في ضربة جزاء للنادي الأهلي في مباراة المقاولون العرب المدافع كان حضن حسام حسن قلعه التيشيرت".
وأكمل: "النادي الأهلي تضرر من التحكيم في الفترة دي وكان فيها تنافس فاحنا لما شوفنا ان في ضرر وقلق في التحكيم وابتدى يبقى في مطالبات مش من الأهلي بس كان من الأندية التانية بتشتكي من التحكيم".
وواصل: "عصام عبد الفتاح انا بحترمه جدا لأبعد الحدود المشكلة مكانتش معاه هو لكن لما بيحصل مشاكل اللي حصل ان استاذ جمال كان متمسك بوجود عصام عبد الفتاح وحب انه يكمل للآخر وحصلت مشاكل وأخطاء تانية بعدها وفي الاخر الموضوع خلص انه مبقاش موجود وقدم استقالته وانتهت القصة لكن مش لدرجة موضوع الخناق قالوا بركات والدرندلي عملوا مشكلة كبيرة".
وأتم بركات حديثه: "الأهلي تضرر ومن حقه يدور على حقه كنادي كبير وبيلعب على بطولة وضع طبيعي لما يتضرر يشتكي ويعمل بيانات من حقه المشكلة ان الدنيا توصل ويتم التصدير لمجموعة من الناس ان الموضوع ده عن تعمد دي بتودينا في سكة تانية".
