وردَة صُوف
وردَة صُوف
قلبى اتقسم فيضان لنيل
جارف وجدًا أينعم، لكن خلالك طَمْيُه زايد حبتين
طارح على أسوار القمر..
نخلة وعيدان الزيزفون/ بتقول يا ليل
أصل الحبيب عابر سبيل
عشمان فـ حضنى السلسبيل
قلبى اتقسم استاد كبير
والكورة طايرة فـ ملعبك
ح تصيب هدف أو تعتزل؟
قرر مصيرى بيرتبك
وبتتلبك حَبة حروف ع الشفة واقفة بترتجف
والشوق سيوف
تستنى من حضنك يثور
ويفش فيها ويعترف..
إنى فـ حياتك كل حاجة
أى حاجة بدونى حتمًا ضيف شرف
من غير طُرَف وهزار عفيف
من غير مناهدة لكل شهقة بتوصفك
بتنفسك
بشويش تعالَى أتغطى بيك وأتونسك
سيبينى ألمسك
وأغرق قوى فـ ثُقب الأوزون
بجنون زليخة وطُهر مريم آسيا سادت أفلاطون
من باب كتاب
وأعتاب قصيدة وحوش رواية وردة صوف
رغم العزوف..
عاشقاك لشوشتى ووسط حوستى قصاد عيون
لِسَّايَا برضو صغيرة
علمنى أشب ازاى وأخطى لشط بحرى أنهض وأعوم
وأشبع دفا تحت الجناح
بين الضلوع متنتورة
مش أفورة
قلبى اتقسم نطفة فـَ جنين
خلِّف ولاد شبهك قوى زى اليمام
زى السحاب الغارقة فى كفوف السما
زى السنابل
كاسية غيطك فين ما كنت وأيْنما
زى الومَا بيفهم إيدين
ويحس نبض الكون دفين
بِقرا الصمد
لرموش ياسين اللى ف حشايا بيستكين بأمه وأبوه
قلبى اتقسم رافعك شابوووو
حالف قَسم
إنك خوارق كل عادة
إنك عبادة
فى الروح بتنشرها السعادة
ع الوش دايمًا تترسم