تحدث سيد عبد الحفيظ مدير الكرة بالنادي الأهلي عن الصفقات الجديدة التي تعاقد معها الفريق لتدعيم صفوف الفريق الأول لكرة القدم بالنادي خلال فترة الانتقالات الشتوية الحالية.
وكان الأهلي قد تعاقد مع خالد عبد الفتاح قادمًا من سموحة، ومروان عطية قادمًا من الاتحاد السكندري، ومحمد الضاوي "كريستو" قادمًا من النجم الساحلي التونسي.
وقال عبد الحفيظ خلال حديثه عبر قناة النهار: "فوجئت بمردود خالد عبد الفتاح كطريقة تفكير حاسس انه كان بيلعب معانا من سنتين تلاتة عنده حاجات لازم يتطور فيها لكن بتكلم على العقلية والشخصية وازاي يبقى موجود في فريق بحجم النادي الأهلي ومباراة كبيرة زي مباراة الزمالك".
وأضاف: "مروان عطية أنا أثق فيه تماما من الأول أنه عنده كرة حلوة وكنت متابعه من السنادي كان في تطور في الأداء.. عندنا ديانج وحمدي فتحي والسولية لكن كان مهم أن يكون في عنصر في الحتة دي علشان طريقة التوزيعة متبقاش كبيرة في المستويات".
وأكمل: "محمد الضاوي مستقبل كبير ولاعب كويس لكن عاوز شغل كتير جدا لأنه ممكن يروح في حتة تانية من ناحية المستوى عنده السرعة رهيبة والمهارة عالية في التمرين المساحات الصغيرة والمساحات اللي فيها زحمة وتكتلات بيعدي من أي حد لكن كمان مهم حتة الخبرة لما اكون رايح أربعة ضد أتنين مش محتاج أجري بالكورة محتاج تمريرة توصلني لكن متوقع أنه في الفترة الجاية السنادي أو السنة الجاية هيبقى مستقبل كبير للنادي الأهلي".
وأتم سيد عبد الحفيظ حديثه: "برونو سافيو لاعب كويس لكن خلينا نحكم على التجربة بعد فترة.. جاب جول في ماتش السوبر ضد الزمالك وجول ضد المحلة وصنع 3 أو 4 أهداف وبعدين اتصاب لكن ان شاء الله يكون كويس الفترة الجاية".
