انتقد حازم إمام عضو مجلس إدارة الاتحاد المصري لكرة القدم، البيان الذي أصدره نادي بيراميدز بعد قرار اتحاد الكرة بتعيين حكم مصري لإدارة نهائي كأس مصر بين الأهلي وبيراميدز.
وقال حازم إمام خلال حديثه عبر إذاعة أون سبورت: "لما كنا بنتكلم مع بيريرا على الحكم الأجنبي اللي هيجي قالنا حاجة مهمة وخلانا اقتنعنا بالكلام، قالنا انتوا جايبنا علشان الحكام مش بيحكموا في أي بطولة دولية ورسمية انتوا ازاي عاوزين الناس تثق فيهم وانتوا في مصر مش بتثقوا فيهم ازاي؟".
وأضاف: "الناس هتقول عندكم حكام جامدين وانتوا كل الماتشات المهمة تدوها لحكام اجانب؟، قال انتوا لازم تحلوا الموضوع وتدوا ثقة للحكام ده الكلام اللي نادي بيراميدز مش موافق عليه بشكل أو بآخر".
وأكمل: "نادي بيراميدز هو نادي محترم جدا أضاف للكرة المصرية بشكل كبير من خلال لعيبة كورة مهمة بتلعب في نادي بيراميدز أنا شايف أنه عمل إضافة، ماتشاته تحب تتفرج عليها فريق كرويا الناس بتحترمه وبتقدره".
وواصل: "هاني سعيد طلع اتكلم عن كذا حاجة أنا مقدر أنه بيدافع عن ناديه، لكن فكرة العدالة مش معنى ان الحكم مصري يبقى العدالة ضايعة الحكم المصري بيحكم كل الماتشات في الدوري المصري في أخطاء أكيد وفي ماتشات تانية ممكن تبقى استفدت من الأخطاء".
وأردف: "بيان بتقول فيه أن ده ضد العدالة علشان حكم مصري؟ هي إهانة بشكل كبير ممكن يقول احنا مش عاوزين بس ميقولش ضد العدالة طب ما في فار موجود، الحكم مبيبقاش عاوز يغلط أو يحط نفسه في مرمى النيران مين هيبقى عاوز يتبهدل ويتهان ويتوقف علشان يبقى عاوز ينجح فريق على حساب فريق ليه مبتحطش نفسك مكان اللي موجود ده؟ هتضيع تاريخك اللي بقالك 10 سنين تعبان فيه علشان بتشجع نادي؟".
وأتم حازم إمام حديثه: "بيراميدز من الأندية اللي اتولدت كبيرة نادي محترم وبيلعب كورة حلوة، أتمنى يركزوا في الماتش أكتر لأن محدش عاوز حاجة معينة، وان شاء الله التحكيم يبقى كويس واللي يكسب يكسب واللي يخسر يخسر وان شاء الله يبقى ماتش نستمتع به".
