النضارة
النضارة
دايمًا
بتسبقك فى الشوف
وتبعت
لعدسة عينيك
سطر مجهول
من قصيدة
أو طبطبة ومنديل
دايمًا
بتعرف تواسى القدم
من حفرتين
ع الطريق
وتلف بيك
طاير
فى نسيم الغيط
لما حكيت
عن.. هشاشة الكلمة
وإزاى.. بيلزق ف كفى
نفس دبلان
سألتنى
عن اتساع الرؤية
وضيق العبارة
نضارة
بتفهم
فى معجزة
الانكسار والإدانة
وساعات.. تضيع
فى زحمة الكومدينو والكراكيب
وتعود
كما الروح
اللى بتكتب شعر
وتوهبك
رفع الدماغ
مع شروق الشمس
والهوا المغسول
فى ركن ضيق
فى الدور الأخير
