أبدى أحمد شوبير الإعلامي بقنوات أون تايم سبورتس، اندهاشه من أمر لجنة الانضباط وعدم استدعاء محمد الشيبي لاعب بيراميدز للامتثال للتحقيق في واقعة حسين الشحات لاعب النادي الأهلي حتى الآن.
وقال شوبير خلال حديثه عبر إذاعة أون سبورت: "مستغرب أوي موضوع لجنة الانضباط والشيبي حدوتة أنا مش فاهمها أنت ليه بتأخر وكل لما تيجي تبعت جواب لنادي بيراميدز تبعتله في يوم ماتش نادي بيراميدز".
وأضاف: "مش لجنة الانضباط دي بتدير عملها من داخل الاتحاد؟ يعني عندهم واحد ماسك جدول الدوري العام وبيقولك ده هيتلعب يوم كذا فعيب يتم تحديد ميعادين ليومين فيهم ماتشين لنادي بيراميدز أمر مش طبيعي جدا".
وأكمل: "وعيب أننا نبدأ نقحم أسماء أصل مين بعت قاله ومين قاله متروحش ومين قاله متعملش ولو جم ناحيتك هعمل واخلي واسوي يا جماعة لو في قوانين طبقوها هترتاحوا القصة بسيطة جدا 1+1=2 في الحاجات دي".
وواصل: "عندنا عدد من المستشارين المحترمين الكبار الموجودين داخل لجنة الانضباط وشغلهم خفيف على فكرة يعني أنا مشوفتش لجنة الانضباط من ساعة ما تم تعيينها غير وبحثت موضوعين تلاتة يعني معندهاش شغل كتير اللي يخليني أقول لا معلش أصل أنا عندي 50 قضية هنا و20 قضية هنا لا ده الشغل خفيف".
واختتم شوبير حديثه: "يا لجنة الانضباط في اتحاد الكرة من فضلكم لو سمحتوا خدوا جدول الدوري العام وحددوا الميعاد شوفوا هتستدعوا الشيبي امتى أو قولوا لا الموضوع ده مش تبعنا وخلاص الموضوع خلصان يروح بقى اتحاد الكرة أو لجنة الاستئناف أو يتقفل الموضوع ويتقال اللاعب لم يخطيء والأهلي بقى ياخد إجراءاته عاوز يروح محكمة دولية عاوز يروح الفيفا عاوز يروح أي حاجة بس أنت اديله القرار لأن حسين الشحات راح المحكمة".
