تامر أمين يعلق على المهازل التنظيمية في أمم أفريقيا بالكاميرون
تامر أمين يعلق على المهازل التنظيمية في أمم أفريقيا بالكاميرون
كشف الإعلامي تامر أمين؛ عن وجود مهازل تنظيمية في بطولة الأمم الأفريقية والتي تستضيفها الكاميرون بمشاركة 24 دولة من بينها مصر.
وقال أمين خلال برنامج "أخر النهار" المذاع على قناة "النهار": "عايز أقولكم دة بجد وبمنتهى الفخر عمار يا مصر؛ لما تحس أن هناك فرق كبير واللي هقوله ليس تنمرا على الأخرين ولكنه إقرار واقع واحنا بنشفق على الأخرين من سوء الأوضاع عندهم".
وأضاف: "في الحالة اللي مصر منورة بمنتدى الشباب وكل دول العالم تشيد بالتنظيم وكل حاجة وعلى الجانب الأخر تلاقي مشاكل بالكوم في بطولة أمم أفريقيا في الكاميرون بقول عمار يا مصر عشان التنظيم والاحترام والخبرة والكفاءة اللي تستطيع تعمل بطولة أفريقيا في شهرين تلاتة وعلى الجانب الأخر مشاكل بالكوم في الكاميرون".
وتابع: "رقم واحد مهزلة حصلت النهاردة في بداية مباراة حصلت بين موريتانيا وجامبيا نزل الفرقتين سخنوا واصطفوا عشان السلام الوطني؛ السلام الوطني لجمهورية جامبيا اتعزف وتمام جه السلام الوطني لموريتانيا اتعزف غلط ولو الحكاية دي اتعملت مع منتخب مصر تبقي كارثة دا خطأ كبير وسخيف واتعزف 3 مرات غلط؛ تلات مرات والتالته مش لاقيينه".
وأوضح: "رقم اتنين في علاقات مع بعض اللاعبية وتواصلت معاهم بعد الماتش الكارثي بتاع نيجيريا الواحد فوجئت أن اللاعبين قاعدين في فندق بالكاميرون على قد الحال أوي وأحد الأصدقاء قالي إن الفندق ميحصلش 3 نجوم؛ تاني أقوى بطولة في العالم بعد بطولة الأمم الأوروبية ومش عارفين يوفرولهم فندق".
وأكمل: "مصر في بطولة 2019 كل الفرق نزلت في فنادق 5 نجوم لاعيبة المنتخب بتقول الحمد لله أن الفندق بس نضيف ومفيهوش حشرات".
واختتم "رقم ثلاثة أكرم توفيق وفتوح جالهم إصابة والجهاز الطبي خدهم عشان يعملهم إشاعة في المستشفى وراحو قالولهم لا والله جهاز الأشعة مش شغال؛ يا جماعة دا في بطولة ألف باء المستشفى المعتمدة للبطولة يكون فيها جهاز أشعة؛ حاجة والله في منتهي العجب عشان كدة بقولكم عمار يا مصر".
