أحمد موسى يهاجم صامويل إيتو: "دي مش روح رياضية"
أحمد موسى يهاجم صامويل إيتو: "دي مش روح رياضية"
هاجم الإعلامي أحمد موسى؛ تصريحات صامويل إيتو رئيس الاتحاد الكاميروني لكرة القدم عن مواجهة بلاده أمام المنتخب الوطني مطالبا إياه بالتراجع عنها على الفور.
وقال موسى خلال برنامج "على مسؤوليتي" المذاع على قناة "صدى البلد": "زعلت أوي من صامويل إيتو؛ كنا بنشجعه وهو بيلعب وكان قوي جدا النهاردة لقيت ليه تصريح غريب ليس له علاقة بالرياضة أزعل من إيتو وأقوله عليك أن تتراجع عن التصريح فورا".
واضاف: "إيتو قال كل ما فعلتوه يتوقف على مباراة الخميس استعدوا بنفس العقلية لأنها الحرب لا يمكنكم ترك هذه الفرصة تضيع؛ أحنا بنلعب كورة يا كابتن إيتو دي مش روح رياضية".
وتبع موجها حديثه لرئيس الاتحاد الكاميروني: "انت بتضغط على الجمهور ليه؟ ياما قابلناكم قبل كدة 27 مرة وغلبناكم 15 ماتش وفازوا علينا ستة وأتعادلنا في ستة وبالنسبة للكاميرون احنا متفوقين ولعبنا في 2006-2008 وخدنا البطولة وهو موجود".
وواصل: "الكاميرون القضية عندهم أننا نظمنا البطولة فالبطولة متخرجش أحنا نظمنا البطولة في 2019 أحسن تنظيم ومخدناش البطولة؛ عايز تاخد البطولة خدها باللعب ولكن مش بالمجاملات وهذه التصريحات أتمنى من إيتو أن يتراجع عن هذه التصريحات ويتكلم عن منافسة في كرة القدم".
وأكمل: "كلام إيتو أنا مستغربه؛ عشان كدة بقول عملية الشحن الموجودة في الكاميرون؛ أن احنا البطولة عندنا فلا يمكن منتخب تاني ياخدها؛ ليه؟ روسيا لما نظمت كاس العالم 2018 خدت كاس العالم؟ والا البرازيل لما نظمت؟".
وأوضح: "في تنافس مشروع لمنتخبك ومنتخبنا واللي هيلعب كويس ربنا يكرمه؛ كلام صامويل إيتو خطر قبل مباراة يوم الخميس اللي بعيد عن كرة القدم وبعيد عن المنافسة وفي الأخر بنتكلم على ماتش كرة قدم والتصريح دة ميخرجش من إيتو ولا من أي حد مينفعش دعم المنتخبات بالتصريحات الصعبة البعيدة عن الرياضة تصريحات إيتو بعيدة عن كرة القدم وممكن تعمل مشكلة للجمهور الكاميروني ولما رئيس الاتحاد الكاميروني يقول الكلام دة أمر يعمل مشكلة للجمهور".
واختتم: "بتقول لا يمكنكم ترك هذه الفرصة هذا مستحيل؛ ليه هو أنت ضامن الماتش؟ لو عندك حاجة مخلياك ضامن الماتش قولنا من دلوفت لكن منتخبنا مش بيركز في الكلام دة منتخبنا مركز في الملعب".
