فيديو| مصطفى بكري يهاجم إبراهيم عيسى: "أنت عايز من البلد إيه؟"
فيديو| مصطفى بكري يهاجم إبراهيم عيسى: "أنت عايز من البلد إيه؟"
هاجم الإعلامي مصطفى بكري؛ تصريحات الإعلامي إبراهيم عيسى والتي أشار فيها إلى أن كل سيدات مصر كن يرتدين المايوهات في في فترة السبعينيات.
وقال بكرى خلال برنامج "حقائق وأسرار" المذاع على قناة "صدى البلد": "اللي طلعلنا اليومين اللي فاتو وبيقول أمهاتكم كل مواليد 1975 كانوا بيلبسوا مايوهات في الصعيد وفي بحري؛ يا عم الحج أنت بتاخدنا للمنطقة دي ليه هو احنا مطلوب النهاردة نمسك اللي بيقروا قرأن في الصيدليات ونسب فيهم وبعدين نمسك فيلم بيروج للمثلية ونشيد بيه ونقول نشيد خانة الديانة في البطاقة".
وأضاف: "اجي النهاردة وأقول نساء الصعيد وفي بحري يامواليد 1975 ارجعوا هتلاقوا أمهاتكم واخواتكم بكل تأكيد لابسين مايوهات ياخي ارحمنا من كلامك دة البلد مش ناقصة انت كل يوم عايز تعملنا فتنة في البلد هو أنت مش سايب حد إلا وهجوم عليه لا صحابة ولا ناس ولا بشر".
وتابع: "أنا بطالب المجلس الأعلى للاعلام بالتدخل دي فتنة على الهواء؛ يابني دانا أمي من ساعة ما جيت على الدنيا وهي بتلبس الأسود؛ أدى صورة أمي أهيه؛ دي تلبس مايو؟ الترعة مفيهاش مايوهات أولا ونمرة اتنين مبيطلعوش ولا بيدخلوا؛ أمهاتنا عملتلك اية ليه بتعمل فتنة في البلد".
وواصل: "إذا كنت شايف في حتة معينة مايوهات متعممش ومتهنش الناس بالشكل دة ومتخليش الناس تطلع تتكلم وتقول إنك بتكذب؛ لمصلحة مين اللي بيجر ادة المفروض يبقي خطابنا عقلاني وقضايانا هي قضايا الوطن والبلد ومتخدوناش لحته كدة أو كدة".
وأكمل: "أنا مرة خدت أمي وماشي بيها نزلتها عشان اركبها من محطة الجيزة وبركبها القطر والله العظيم كأني ماشي مع أعظم انسانة في الدنيا؛ دي تلبس مايو؟ أنت مستثنتش حد؛ عايز ايه من البلد أنت وغيرك كفاية تشكيك في المجتمع وادعاءات كاذبة".
وأوضح: "والله المفروض المجلس الأعلى للإعلام يجيبك ويحقق معاك ويتخذ معاك إجراء؛ انت بتعمل دة عشان ايه؟ عشان تقول والله يا جماعة كلكم متختلفين والستات كانت بتلبس مايو".
واختتم: "لا يصح هذا الكلام وأنا بدعو المجلس الأعلى لتنظيم الإعلام أنه يحقق في كل كلمة بتعمل فتنة ودي مهمته ودي رسالته واحنا واثقين الكود اللي عمله المجلس الأعلى فيما يتعلق بإثارة الفتنة بالتأكيد أنه يكون ليه موقف في هذا الإطار".
