علق الإعلامي أحمد شوبير على أداء النادي الأهلي في مباراة المريخ السوداني والفوز بثلاثة أهداف مقابل هدفين في دور المجموعات بدوري ابطال افريقيا أمس السبت.
وقال شوبير خلال برنامجه الإذاعي صباح الأحد "الأهلي نجح في تسجيل هدفين في بداية الشوط الأول وكان من الممكن أن يزيد حصيلة الأهداف إلى 3، ولكن فجأة وبدون مقدمات وبدون داعي سجل المريخ الهدف الأول قبل نهاية الشوط".
وأضاف "في الشوط الثاني كرة لحسين الشحات على بعد 4 او 5 ياردات من خط المرمى يهدرها وترتد بهدف في شباك الأهلي واتكهربت المباراة".
وتابع "مش بتكلم على نوعية التبديلات، لكن انا مستغرب وبكون في حالة ذهول من الي بيحصل، نازل في الدقيقة 64 وبتلعب 25 دقيقة سواء طاهر او حسين الشحات ومفيش حاجة ظهرت، الي عمل حاجة شوية هو حمدي فتحي لما نزل وشارك".
وواصل شوبير "الأهلي أه حصد 3 نقاط يحسنوا موقفه في المجموعة ولكن مش كل مرة تسلم الجرة، الأهلي جت عليه كرتين اتسجلوا بهدفين، في مباراة صن داونز ايضًا تسديدة واحدة بين القائمين والعارضة اتسجلت هدف، وفي مباراة فاركو نفس الكلام".
وأردف "الي كان عاوز يزور شباك الأهلي زمان كان بيكون صعب جدًا جدًا انك تسجل هدف في شباكه، الأهلي كان بيقعد فترة بدون هز شباكه، لأول مرة فريق سوداني يسجل هدفين في مباراة واحدة في فريق مصري على ملعبه".
متابعًا حديثه "لو المباراة كانت انتهت بالتعادل كانت خلال كل عام وانتم بخير، الأهلي هيصعد ان شاء الله ولكن بالشكل ده في حاجة غلط، في حاجة غلط بقى لياقيًا او فكريًا او ثقة زايدة عن الحد، احنا فرحانين ان الأهلي يعني في المركز الثاني؟ ما طبيعي الأهلي يكون أول أو ثاني، تفائل بالمركز الثاني في المجموعات ولكن ماذا بعد؟".
واستكمل شوبير تصريحاته قائلًا "مفيش فريق بيكسب على طول، لكن على الأقل تبين انك انت البطل، الأمر محتاج وقفة ودراسة مش محتاج عند، تشوف ايه الاخطاء وتحاول تعالجها".