باشا ..جاهز للسفر؟ والأمورة كمان جاهزة؟
متحمسين ترجعوا البيت خلاص ولا لسه عايزين تفضلوا شوية!!
طيب وضبتوا الشنط؟ حطيتوا كل حاجة! ..خالي بالك هتتفتشوا.. بلاش ممنوعات.
طيب معلش هتملوا معنا كده كام ورقة، شوية أسئلة بسيطة..
واللي يخلص و”جاهز” يتفضل يسبق يأخد مكان..
ومعلش لو في شوية مشيوا بدري.. كله هيسافر بس مش في نفس الوقت..

ده بالضبط اللي بيحصل معنا في غربتنا علي الارض.. نفس الحوار كده.. بس علي كبير بقي.. واكيد مش هيندهونا باشا والأمورة..

هنتفتش..الشنطة اللي فيها أفكارنا وأعمالنا هتتفتح.. اللي واخد معاه اخطائه ممكن تتصادر وهو ما يعديش.

هنملئ الورق.. بياناتك بقي وسيرتك الذاتية و اختبار صغير كده والشاطر اللي يملأ كله صح..

*جاهز ! اتفضل
*مش جاهز هتفضل لحد ما يبقي انسب وقت ليك وهتسافر تحصل اللي سبقوك..
المشكلة بس ان مش كل الناس هتوصل نفس المكان ..
لو كلنا صالحين يبقي في أمل نتقابل تاني مع بعض.. و نوصل لنفس المكان destination..

طيب اللي سبقوا دول هيستوننا ولا ايه !! ايوه طبعاً..هيستنوا وهيفضلوا يشجعونا علشان هما كمان نفسهم الشمل يتلم تاني..

بنودع بعض بس على رجاء القيامة.. اللي فيها كلنا هنشوف بعض تاني.. هنشوف تيتة وجدو.. واللي هيشوف اهله واللي هيشوف ولاده والاصحاب هتتجمع.. ويمكن نشوف ناس كانوا السبب في وجودنا واحنا ما نعرفهمش !! ممكن نوصل لحد ادم وحواء عادي قدامنا ..

ده مش إيمان ديانة مُعينة ..ده اللي كل العقائد متفقة عليه..

توضب دُنيتك.. تحل امتحانك.. تجهز.. تسافر.
الحلو بقي واللي يُعتبر الجانب المُشرق ان الامتحان اصلاً من كتاب مفتوح open book
كلنا عندنا الكتاب اللي فيه الاجابة، ومعنا الشرح والقاموس وكله تمام ..بس برضه مش عارفين نحل ساعات..بنهنج كده . ده احنا مش عارفين حتي نغش.. يمكن شوية تركيز في المراجع والدنيا تضبط!
اويمكن بننسي اصلاً اننا معنا الكتب، ومش بنبص فيها .

اللي خلص وسبق ووصل بقي مستريح.. واللي لسه هنا قاعد محتاس وبيلف حوالين نفسه.. وكل سؤال بيعدي بتجربة اتقل من السؤال اللي قبله..

يا رب بقي ادينا اننا نخلص الامتحان صح.. ما تسحبش الورقة مننا غير لما تبقي اجاباتنا كفاية تعدينا حتى من الباب ونلمسك..
اجمعنا باللي بنحبوهم لو دي مشيئتك.. وهون علينا ايام غربتنا دي علشان بقيت صعبة قووووي بجد وكلها وجع قلب.. ساعات بحس ان الاية اللي بتقول “لا تكن الا فرحاً” بقيت اصعب فقرة في الموضوع.. مش عارفين نفرح ..ولا لاحقين أساسًا..
بس واثقة انك تجرح وتعصب..تسحق ويداك تشفيان
ومش هتسبنا تايهين وتعبانين كده كتير ..
لأنك إله رحيم ومراحمك لا تزول ابداً
أمين
#تكفيك_نعمتي