عمرو أديب يطالب المركزي بتوضيح الأنباء حول شراء 44 طن ذهب: "أنت اشتريت غويشة للمدام"
عمرو أديب يطالب المركزي بتوضيح الأنباء حول شراء 44 طن ذهب: "أنت اشتريت غويشة للمدام"
طالب الإعلامي عمرو أديب؛ البنك المركزي المصري؛ بالكشف عن حقيقة ما تردد عن شراء 44 طن من الذهب خلال فبراير الماضي.
وقال أديب خلال برنامج "الحكاية" المذاع على قناة "أم بي سي مصر": "معلومة بسيطة أنا لو عرفتها ياريت بس المركزي يقولنا؛ الكلام عن شراء 44 طن دهب مصر كلها بتتكلم فيه؛ طيب اشتريتوا أمتى واشتريته بكام محدش يعرف".
وأضاف: "هو دا عيب؟ دانا أفرح قولي أنا اشتريت دة عشان أعمل كذا؛ أنما يقولك اتحاد الذهب العالمي قال ونازل في كل المواقع؛ هو أنت اشتريت غويشة للمدام؟ دول 44 طن دهب عايزين نعرف عنهم أي حاجة".
وتابع: "اشتريت دي سياساتك المالية قررت أن يكون جزء من الاحتياطي بتاعك أنه يكون دهب؛ والناس اللي حسبوها قالك دا 20% من الاحتياطي بتاعك انما أقراه في كل حتة وفي مجلة ميكي ومش لاقي ورقة رسمية تقول أنك اشتريت 44 طن دهب".
وأوضح: "محتاجين المركزي يبقى معانا وفي شوية شفافية ويكلمنا؛ والبيان اللي طلع من المركزي بيقولك على فكرة يوم 19 مايو ملناش دعوة بكل اللي بيحصل دة".
وأكمل: "أي حاجة هتقولهالي هصدقها؛ أنت المركزي؛ هتقولي في هقولك حاضر معنديش مش هقولك حاجة؛ أنا مرة كان عندي لقاء مع بطرس غالي كان وزير الاقتصاد أيام الرئيس حسني مبارك وسألته عن فلوس التأمينات وكانوا بيقولوا مش لاقينها قلتله يا دكتور يوسف فلوس التأمينات موجودة قالي طبعا؛ تعالى عدها".
واختتم: "قولي لا احنا مشتريناش دهب؛ أو يا مصر أحنا اشترينا 44 طن دهب أو قولي جملة تالتة وهصدقها بردو ملكش دعوة هذا أمر متكلمش فيه لأسباب لها علاقة بالسوق يا جماعة الخبر موجود في كل حته دا السر اللي عارفه 100 مليون مصري".
