عمرو أديب يهاجم اتحاد الكرة: "المنظومة كلها ضايعة.. إيه العشوائية دي؟"
عمرو أديب يهاجم اتحاد الكرة: "المنظومة كلها ضايعة.. إيه العشوائية دي؟"
هاجم الإعلامي عمرو أديب؛ مجلس إدارة اتحاد الكرة مشيرا إلى أنهم يتعاملون مع الكرة المصرية بطريقة عشوائية ودون تخطيط.
وقال أديب خلال برنامج "الحكاية" المذاع على قناة "أم بي سي مصر": "حالة من الحزن والألم بسبب مباراة إثيوبيا الأمس والهزيمة المذلة والغريب بعد الماتش تكتشف أمرين الأمر الأول أن الفرحة عند إثيوبيا دوبل".
وأضاف: "الحقيقة التانية أن أنت مكانش عندك حافز إضافي والا أشرح؟ أنت مفروض يكون عندك حافز إضافي؛ شوفوا بقي أحنا بقالنا سنين كل ما تيجي تكلم يقولك أستني أديله فرصة أستني طيب قبل أو بعد".
وتابع: "أمال أمتى الوقت المناسب؟ ما هو الوقت المناسب اللي هنتكلم فيه عن الكورة المصرية؟ أنت جايب مدرب معندوش سي في؛ دانت فجأة أمبارح وأنا قاعد قلت هو أحنا مشينا حسام البدري ليه؟ طيب كيروش مشيناه ليه داحنا مشيناه وهو في النهائي".
وواصل: "ايه اللي جرا؛ المنظومة كلها ضايعة؟ منتخب ضايع واتحاد ضايع وإعلام ضايع وجمهور ضايع؛ كلنا ضايعين؛ اللاعيبة معندهاش حافز محدش بيفكر في حاجة".
وأكمل: "هما عملوا ايه؟ هما مكانوش برازيل أنت اللي كنت البراجيل؛ منتخب صغير بيلعب في دوري بعيد عن الأضواء وقررت توديهم يلعبوا في بطولة أفريقيا".
وأوضح: "دا البراجيل أكيد كان هينزلوا وتحط جواهم الحافز؛ أنما مفيش أي حاجة خالص؛ ونلاقي الشماعات أصل اللاعيبة أصل الجو أصل مغرقين الملعب".
وذكر: "انتوا ناويين تعملوا حاجة في الموضوع دة والا عايزين تسيبوها كدة وبيقولك اتحاد الكرة عامل اجتماع وهيبقي بين قرارين خلوا الراجل وادوله فرصة أو لا لا روحوا هاتوا مدرب".
واختتم: "اية العشوائية دي؟ أنتوا مخططين حاجة؟ والا انتوا بتوع النهاردة وبكرة وماتش وماتش؛ وخلوا الناس تجيب اتحاد كورة مش بالطريقة اللي بيجي بيها دي؛ احنا عندنا مشكلة ولازم يكون في حل هل مصر مفيهاش حد بيفهم في الكورة؟ دا هو أمبارح نزل تلات شباب صغيرين الماتش انقلب".
