"هتشوفوا فرقة تانية".. تامر أمين يكشف عن تغييرات كبيرة في الأهلي
"هتشوفوا فرقة تانية".. تامر أمين يكشف عن تغييرات كبيرة في الأهلي
أكد الإعلامي تامر أمين؛ أن النادي الأهلي سوف يشهد تغييرات كبيرة على مستوى فريق الكرة خلال الفترة المقبلة بالإضافة إلى مستويات الاختصاصات والتكليفات.
وقال أمين خلال برنامج "أخر النهار" المذاع على قناة "النهار": "أنا عارف أن جمهور الأهلي زعلان وغضبان؛ ورغم كل دة أنا زعلان وحزين عشان البطولات اللي بتبضيع لكن مش كاره اللي بيحصل في جزء كبير فيا فرحان باللي بيحصل".
وأضاف: "اللي بيحصل كان لازم يحصل عشان الأفضل يجي ومكانش هيحصل فوقان إلا لو كان اللي بيحصل دة بيحصل؛ ورب ضاره نافعة اللي بيحصل دلوقت عشان النفع اللي هيحصل قدام".
وتابع: "الخطأ الأساسي لمجلس إدارة الأهلي أنه في عز الفرحة مبصناش لبكرة وفي عز الانتصار مرتبناش لبكرة ودي لها علاقة بالاستدامة في علوم الإدارة".
وواصل: "وقت ما الأهلي كان بيفوز بالدوري والكاس كنا بنفرح بس؛ محصلش اجتماع في عز الانتصار وقلنا السنة الجاية هندعم الفريق بايه؛ مين الصفقات اللي لازم نشتغل عليها دلوقت بمبدأ أن الحصان الكسبان خليه كسبان".
وأكمل: "هما كانوا كسبانين بس مبصوش على يوم زي النهاردة؛ الشناوي جبل بس يقع؛ قفشة ممتاز بس بنزينه يخلص والسولية هايل بس سلم نمر؛ أوراق الشجر بتتساقط واحد ورا التاني ومعندناش التجهيز ولو حصل حاجة غير اللي بيحصل دلوقت كان هيبقي استثناء".
وواصل: "شفتوا ماتش المقاولين؛ اللاعيبة مش قادرة ومفيش لاعيبة؛ حصل إصابات وابتديت مش تدور على الدكة؟ ولكن على جماهير التالتة اللي بيعرف يلعب يا جماعة ينزل يلعب معانا".
وأوضح: "بمعلوماتي ومصادري جوة النادي الأهلي أنا عارف دلوقت أن في ثورة اصلاح وهي في مجالات كتيرة؛ في ثورة اصلاح على مستوى اللاعبين والصفقات وعلى مستوى الاختصاصات والتكليفات بيحصل إعادة وترتيب للبيت".
واختتم: "تقريبا السنة الجاية هتشوفوا فرقة تانية ماعدا بعض الأسماء المعدودة المحدودة من الفريق الحالي وأغلب الفريق اللي جاي هيبقي من اللي جاي وأيا كان اللي هيجي هيبقي أحسن من ناس كتير من الموجودة دلوقت".
