أعرب محمد هاني لاعب الفريق الأول لكرة القدم بالنادي الأهلي، عن سعادته بعد تأهل الفريق إلى نصف نهائي دوري أبطال إفريقيا.
وتأهل المارد الأحمر إلى نصف نهائي دوري أبطال إفريقيا للمرة الـ 20 في تاريخه، بعد الفوز على سيمبا التنزاني ذهابًا وإيابًا.
وقال محمد هاني خلال حديثه عبر قناة بي إن سبورتس بعد نهاية المباراة: "الحمد لله على المكسب أنت عملت اللي أنت عاوزه وكسبت وصعدت أنا مش شايف أن كان في تراخي كان في تاكتيك معين المدرب طالبه واحنا نفذناه وفي الاخر حققنا الهدف المطلوب أننا نكسب ونصعد".
وأضاف: "مفيش اي تفضيلات أو فريق معين عاوزين نلاعبه في نصف النهائي.. الفريق اللي هيبقى موجود هنركز ونحضر ونشوف نقاط القوة والضعف ونشتغل عليها كل الفرق الموجودة كويسة وبتنافس هدفنا اننا نحافظ على اللقب ان شاء الله".
وواصل: "مفيش سر معين لظهوري بشكل مميز الفترة الأخيرة.. أنت بتشتغل وبتجتهد الناس مبتبقاش شايفة ده أنك بتشتغل على نفسك وكمية التضحيات اللي بتضحي بيها في الآخر هي تفاصيل صغيرة أنت لو اشتغلت عليها هتلاقي نفسك في الاخر وصلت لحاجة كبيرة كويس أن في ناس شايفة أني بجتهد وبعمل اللي عليا وفي الأول والآخر النتيجة دي بتاعت ربنا أنت بتشتغل على نفسك والنتيجة بتاعت ربنا".
واختتم هاني حديثه: "شكرا لجمهور الأهلي انهاردة الاستاد مليان أنت في رمضان والناس صايمة ندهوا على كل اللعيبة وشجعوهم من أول دقيقة لآخر دقيقة شكرا ليكم ودايما في ضهرنا ويارب نكون عند حسن ظنهم ونعملهم حاجة تفرحهم".
