كود – عن بي بي سي //
هادي مدة وشركة “نوفافاكس” (Novavax) الطبية الأميركية كتخدم على تطوير فاكسان جديد ضد كورونا، ومن بعد تجارب كثيرة فبريطانيا بان باللي هاد الفاكسان فعال بنسبة مزيانة كتوصل ل89.3 في المية.
و قال المتخصص فالشؤون الطبية ف “بي بي سي” أن هاد الفاكسان هو الأول اللي بانت الفعالية ديالو ضد النوع الجديدة ديال فيروس كورونا اللي بانت فبريطانيا مؤخرا.
رئيس وزراء بريطانيا، بوريس جونسون، قال أن هادي خبار زوينة و أن هيئة تنظيم الأدوية في بريطانيا غادي تبدا تقييم الفاكسان.
الحكومة البريطانية كتتوقع أنها تتوصل بالجرعات من هنا ل6 شهور التالية فهاد العام 2021، من بعد ما توافق عليه هيئة تنظيم الأدوية ومنتجات الرعاية الصحية.
فاكسان “نوفافاكس” هو ثاني لقاح ضد كورونا اللي دارو عليه تجارب كثيرة فبريطانيا من بعد الفاكسان ديال جامعة “أكسفورد” وشركة “أسترازينيكا”.
و كانت المرحلة الثالثة ديال التجارب على هاد الفاكسان الجديد شملات عدد من المتطوعين.. شي 15 ألف شخص عندهم ما بين 18 و 84 عام، 27 فالمية منهم فايتين 65 عام.
