تحدث العامري فاروق نائب رئيس النادي الأهلي عن ملف العاب الصالات داخل القلعة الحمراء في الكرة الطائرة وكرة اليد وكرة السلة.
وقال العامري في تصريحات إذاعية عبر الشباب والرياضة "مشهد كرة اليد على طاولة مجلس الادارة، في مفاجات طيبة جدا في اليد وباقي الألعاب".
وتابع "احنا بنخلص الملفات ومش عاوزين نعلن حاجة بحاجة، احنا عاوزين نعلن كل حاجة مرة واحدة بشأن اليد والطائرة والباسكت، الملفات هتودي الدنيا في حتة تانية خالص داخل الأهلي الموسم الجاي".
وأضاف "في متابعة كبيرة في الملفات دي، مع محمود الخطيب وخالد مرتجي احنا على اتصال دائم بالنشاط الرياضي وفي ترتيب كامل وفي ملفات انتهت، هيتم الاعلان في الفترة القادمة بس بعد ما نخلص كل حاجة سواء صفقات او مدربين".
وواصل "بطمن الجماهير اننا هنروح في حتة تانية خالص الموسم الجاي، حاليًا بيعاد تشكيل الملفات بالكامل على مستوى الرجال والسيدات وبيتم الترتيب بشكل كويس، وفي عناصر انتهت وبننهي ملفات أخرى".
وأردف العامري "الأمور تعود بالتأكيد دائمًا للمدير الفني، طارق محروس مثلًا كان شايف انه يقدر ينافس بالمجموعة دي، هو كان موفق او لا دي قصة تانية، لكن انا بقول لجماهير الاهلي الموسم الجاي هنروح في حتة تانية خالص".
واختتم نائب رئيس الأهلي تصريحاته "بطالب الناس تهدى ومن حقهم يكتبوا ويطالبوا، لكن في جزء من الي بيقولوه مش موجود على ارض الواقع وممكن ابقى سايب الناس تتكلم وانا شغال في حاجة تانية".
