كشف سفيان بلمقدم، "كابو" جماهير الجيش الملكي، عن حجم المعاناة التي تعتريه بعد دخوله السجن، على هامش أحداث الشغب التي وقعت عقب نهاية مباراة فريقه والمغرب الفاسي في مسابقة كأس العرش.
وتساءل بلمقدم المعروف بإسم "طيرو" عن الأسباب التي دفعت السلطات لاعتقاله رغم كون الأدلة وكاميرات المراقبة تشير إلى أنه غادر الملعب بمجرد انتهاء المباراة، ولو يشارك أو حرض على أحداث الشغب بين الطرفين.
وأبدى بلمقدم حزنه لكونه مسجونا لأزيد من شهر بسبب تهم لا علاقة له بها، مؤكدا أن مطالبته بالحرية ليست شعارا بقدر ما هي حق له، ومشيرا إلى قبوله لأي أحكام لو كان بالفعل من مسببات أحداث الشغب رغم أنه شدد على كونه بعيدا عنها أو عن تهمة تحريض جماهير الجيش الملكي لممارستها.
هذا وأشار بلمقدم كذلك إلى حالة زميله عمر التومي الموقوف رفقته، مبديا تعجبه من الاعتقالات التي تطال "الكابوات" في كل فرصة تقع فيها أحداث الشغب، مطالبا بالنظر في حاله رفيقه الذي يجد نفسه بعيدا عن زوجته التي تشرف على الولادة.
وفيما يلي رسالة سفيان بلمقدم كاملة:
قريبة لشهر وأنا فبلاصة ماشي ديالي وعمري كنت كنفكر نحط فيها رجلي شي نهار، لأنه ببساطة ما عمري درت علاش، حتى لقيت راسي فيها ظلما.
اليوم قريبة لشهر وأنا بعيد على الأم والزوجة ديالي، على خدمتي وحياتي، لي عمر كان فيها المشاكل ولا الحبس ولا شي حاجة خارج إطار القانون، حتى كنلقى راسي كنتحاسب بتهم لي ربي وحدو لي عارف أنني بعيد عليها، والأغرب أن من بين التهم من غير التحريض، الاتجار فالمخدرات، تكوين عصابة إجرامية و عدم تبليغ عن جريمة..
واش خوكم سفيان وجه الاتجار فالمخدرات؟!
واش خوكم سفيان وجه تكوين عصابة؟!!
واش ما تحماقش ونتا كتفكر فتهم بحال هادي!!!
سفيان كيعرفو كل واحد فيكم، هادي سنوات وهو كيعطي من وقتو ومن جهدو باش يساهم بداكشي لي قدر عليه ككابو ديال الجمهور، وما عجبنيش شنو وقع فمقابلة المغرب الفاسي، وعمري غنكون معاه، ولا مع أي حدث فيه العنف، لأنه الاعتداء على الأمن ما كيشرفش الجمهور، وتخريب الممتلكات ما كيشرفش حتى حد، ولكن اليوم كنلقى راسي كنتحاسب على هادشي، بحالا أنا لي درتو !! نفس الأسطوانة ديال جيب الكابو غتبقى تعاود فالمغرب؟ مع العلم أن الملعب فيه كاميرات فيه وسائل مراقبة، وأنا غادرت الملعب قبل الصداع بالأدلة والفيديوات والشهود، إذا علاش أنا هنا؟ شنو التهمة ديالي الفعلية، وشناهي المساهمة ديالي فهادشي من غير الكلمة الفضفاضة ديال التحريض؟
عمر التومي لي حتى هو معايا فنفس المشكل بلا ما نحتاج نقوليكم عليه أنه إنسان مسالم وولد عائلة وكيبغيه الصغير قبل الكبير، وعمرو كان فشي حاجة عندها علاقة بالشغب، اليوم كيلقى راسو كيتحاسب على شي حاجة ما دايرهاش حيت كيطلع كابو، وخاصكم تعرفو أن ولدو غيتزاد وهو هنا، حيت الزوجة ديالو على مشارف الولادة.
كلشي عارف أنني لا أنا لا عمر أبرياء من هادشي كامل، حتى لي شادينا عارفينها، كلشي عارف أننا ناس مسالمين وعمرنا حرضنا ولو بالكلام، ولكن ربي كبير وهادي محنة وغادي تفوت، هذا قدر الله وله حكمة في ذلك..
الحرية لينا، ماشي شعار، الحرية لينا حيت نستاهلوها، ومظلومين ماشي شعار، مظلومين حيث عيب دراري فمغرب 2022 مشدودين لمجرد أنهم كابوات، كون كنا دايرين ولا مشاركين نستاهلو والقانون فوق الجميع، ولكن النهار كيدوز علينا هنا بحال عام، حيت ما دايرينش وحيت أبرياء، وحيت خلينا عائلات، وخلينا خدامينا مورانا.. ربي كبير وغادي يفرجها بإذن الله، والإيمان ديالنا بالله والبراءة ديالنا ما غيوقفها حتى حد.
