وجه مودي الجارحي قائد الفريق الأول لكرة السلة بالنادي الأهلي رسالة للجمهور بشأن تجديدات عقود اللاعبين أو رحيل البعض بشكل أو بآخر عن صفوف القلعة الحمراء.
وكتب الجارحي عبر حسابه الشخصي على موقع التواصل الاجتماعي فيسبوك: "مفيش لاعب بيضحي عشان خاطر النادي الاهلي، عدد محدود البيضحي بجد وانا عارفهم و بالأسم في كل الالعاب، الكل بيستفاد من وجوده في النادي الاهلي وجود اي لاعب في النادي الاهلي دا شرف كبير اوي".
وأضاف: "قبل النادي الاهلي الاعب مفيش اتنين عارفينوا في الشارع بعد النادي الاهلي مصر كلها عارفاك لمجرد ارتباط اسمك بأسم النادي الاهلي والامثلة كتير اوي ، انك ترحل او تتفاوض علي الفلوس دا حقك طبعا كل واحد بيشوف مصلحته و لكن احنا كجمهور النادي الاهلي علينا عامل كبير اوي في الكلام دا عشان احنا بنكبر اي حد وبنحسس اي حد انوا فوق النادي و بنضغط علي الادارة ومعرفش علي اساس ايه بنعمل كده".
وأكمل: "اللاعب دا بياخد عقد قدامه بيتمرن وبيلعب ومطلوب منه يكسب اي بطولة بيلعبها او يعمل اللي عليه والتوفيق دا بتاع ربنا ، لا احنا كجمهور بعد اي ماتش ننزل ٥٠ بوست للاعب نشكره و نحسسه أنه خيره علي النادي وانوا كان بيلعب لوحده فا طبيعي الاعب وهو بيجدد هيتشرط علي النادي ولما يجي النادي الاهلي يقولوا دا اخرنا في الفلوس و دا الصح طبعا فا اللاعب يمشي فا الجمهور بيكون عنده صدمة لا احنا النادي الاهلي والنادي الاهلي مش بيوقف علي حد في اي لعبة".
وواصل: "الاسطورة كابتن محمود الخطيب اعتزل والنادي الاهلي كسب ابو تريكة اعتزل والنادي الاهلي كسب نجوم كتير في كل الالعاب اعتزلت والنادي الاهلي هو النادي الاهلي هيفضل يكسب ان شاء الله، علي فكرة انا بقول الكلام دا وانا لاعب وكابتن النادي الاهلي وزي اي لاعب والكلام دا ينطبق عليا ولكن الحمد لله طول عمري عارف ان النادي الاهلي خيره علي الواحد اكيد اوقات بتزعل وتدايق من حاجات و لكن عمري ما اقدر اساوم النادي الاهلي قلبي ميجبنيش اني اعمل كده ودا اللي بابايا ومامتي ربوني عليه".
واستطرد: "وانا بتكلم دلوقتي بلسان واحد من جمهور الاهلي وبالمناسبة اي لاعب يقولك انا مضيت علي بياض بيكون الكلام دا اي كلام بيكون عارف كويس اوي عقده ايه ودا حقه طبعا ولكن ميقولش بضحي وفي لاعب تاني مش بيمضي غير وكل حاجة مكتوبة في العقد ودا حقه هو كمان بس ميقولش بضحي والمشكلة ان التمثيل والضحك علي الجمهور هو دا الماشي اليومين دول ولكن هيجي اليوم الهيبان مين بيمثل ومين بيحب النادي بجد".
وأردف: "وعلي فكرة في ناس زي ما قولت في اول كلامي بضحي عشان النادي وفي كل الالعاب موجودين الناس دي اللي تستاهل الشكر والتقدير علي حبها وغيرتها علي النادي الاهلي واخر حاجة عايز اقولها وجود اي لاعب في النادي الاهلي في اي لعبة دا شرف بيحلم بي ملايين غيرك".
وأتم مودي الجارحي رسالته: "النادي الاهلي فوق الجميع".
