تامر أمين: "كيروش جرسنا برة ومفيش مدرب راضي يتعامل معانا"
تامر أمين: "كيروش جرسنا برة ومفيش مدرب راضي يتعامل معانا"
علق الإعلامي تامر أمين؛ على فشل الاتحاد المصري لكرة القدم في الاتفاق مع مدير فني جديد للمنتخب الوطني لكرة القدم لافتا أن المدربين الكبار يرفضون التعامل مع الاتحاد الحالي.
وقال أمين خلال برنامج "اخر النهار" المذاع على قناة "النهار": "للأسف الشديد لا جديد يذكر ولا قديم يعاد؛ أتحدث عن اتحاد كرة القدم المصري من امبارح تم الإعلان عن مؤتمر صحفي للإعلان عن قرارات اتحاد الكرة والإعلان عن مدرب المنتخب".
وأضاف: "الاجتماع كان معاده واحدة الضهر اتاخر شوية قلنا ماشي؛ وقعد ست ساعات ولسة خلصان من شوية وقلنا ماشي دا اجتماع مطول فيه قرارات هتهز الدنيا؛ خلص الاجتماع وملقنياش مؤتمر صحفي قلنا خير تمشي وقالوا هيصدر بيان وقلنا كويس أهو البيان فيه نقط وقرارات".
وتابع: "مسكنا البيان نقلب أن نلاقي فيه اسم مدرب؟ مفيش؛ أن في الأعلان عن المدير الفني للمنتخب زي ما قالوا مفيش؛ انتوا مجتمعين عشان تقولولنا مساعيكو ومجهوداتكم أسفرت عن ايه".
وأكمل: "أنا هقولكم أسفرت عن ايه؟ أسفرت عن أن محدش من المدربين اللي ليهم أسماء تقيلة رضي أنه يدرب منتخب مصر؛ ليه؟ قالك أنا مش عايز أتعامل مع الاتحاد دة".
وأوضح: "طيب أنتوا عرفتوهم منين قالك كيروش قالنا؛ المدير الفني السابق للمنتخب الوطني؛ هو قال سيبكم من أني مخدتش فلوسي قال إنه لم يرى عدم احترافية مثل الاتحاد المصري وبالبلدي كارلوس كيروش جرسنا في الأوساط العالمية وخصوصا الأوساط البرتغالية".
وأكمل: "دا اللي قاله سوزا؛ المدير الفني البرتغالي اللي كان الاتحاد المصرية بيفاوضه لحد الصبح؛ وهو قال لا اريد التعامل مع هذا الاتحاد طيب عرفتوهم منين؟ قالك سمعته سبقاه".
واختتم: "قالك بلاش سوزا ونشوف مدرب سويسرا السابق؛ ودا اعتذر دلوقت وقال مش ناوي أدرب خارج أوروبا وبالتالي الاتحاد اجتمع ومعندوش موافقة من أي حد ودا لازم يكون جرس انذار".
