عمرو أديب عن زيادة الأسعار: "في حاجة غير طبيعية بتحصل"
عمرو أديب عن زيادة الأسعار: "في حاجة غير طبيعية بتحصل"
علق الإعلامي عمرو أديب؛ على الزيادات المتتالية في أسعار السلع مشيرا إلى أن الزيادات لا تتناسب على الإطلاق مع نسب الزيادة في الخارج ونسب التضخم.
وقال أديب خلال برنامج "الحكاية" المذاع على قناة "أم بي سي مصر": "في كل الطبقات أيا كان طبقة عليا أو متوسطة أو غير متوسطة أي حد بيتكلم وهذا أمر موجود في كل مكان في العالم يحدثك في الأسعار دائما وأبدا يقول أنت عارف كنا بنشتري دي بكام وبقت بكام".
وأضاف: "في حاجة غير طبيعية في الأمر يعني مثلا هوسة البيض ومعركة البيض والدولة تتدخل عشان البيض؛ وياجماعة الإعلاف أسعارها بترخص القمح سعره بيرخص الحاجات برة وجوة بترخص؛ ليه عندنا بتزيد؟".
وتابع: "في حد من مصلحته يفضل يزق في طبق البيض دة أبو 75 يبقي بـ 80-90 عايزه يزيد لسبب أو لأخر؛ وفرصة في وسط الزحمة أنت مش شايف الحرب الأوكرانية أنت مش شايف الروس بيقولوا ايه؟ أيوة مال دة ما طبق البيض؟ أيوة ليه علاقة بس مش بالطريقة دي".
وواصل: "في شيء غير طبيعي بيجرا؛ في شيء مش متواكب مش قد الزيادة؛ كله كوم والحاجات المستوردة كوم تاني؛ أي شيء داخل فيه مكون مستورد قفزات مذهلة؛ ليه الحاجة زايدة كدة عن أي حته في العالم".
واختتم: "أنا بقول لحضراتكم بشكل واضح صريح؛ من هنا لأخر السنة هي أصعب شهور من أول الازمة مش أغلاها؛ هي أصعب على الدولة وعلى الفرد؛ أن يدبر الفرد مصاريفه وأن تدبر الدولة مصاريفها".
