«مش زي ما احنا عايزين».. هدى المفتي تُعلق على مشاركاتها في موسم عيد الأضحى
«مش زي ما احنا عايزين».. هدى المفتي تُعلق على مشاركاتها في موسم عيد الأضحى
علقت الفنانة هدى المفتي، على أعمالها الفنية الثلاثة التي شاركت بها في موسم عيد الأضحى، وهي "كيرة والجن" و"بحبك" وعمهم".
وأوضحت "هدى"، في تصريحات تلفزيونية، أن عرض الأفلام الثلاثة في نفس الموسم لم يكن مخططا له من البداية، مؤكدًة: “صدفة بحتة بعيدة عن أي ترتيبات”،وتابعت: “مهما بنرتب الدنيا مابتمشيش زي ما إحنا عايزين بالذات في الشغل.. اللي حصل صدفة بحتة”.
وأكملت: "أنا بقالي 3 سنين شغالة على فيلم (كيرة والجن)، وفيلم (عمهم).. بنصور فيه من الصيف اللي فات وكان المفروض ينزل في رأس السنة لكنه اتأجل لأجازة عيد الفطر ثم عيد الأضحى، وفيلم (بحبك) مع تامر حسني لما جالي بدأته على طول وأكيد مش هقول لأ لفيلم مع نجم الجيل".
وتابعت: "الترتيب الأصلي إن كل فيلم كان هيبقى في موسم مختلف، بعدين لقيتهم بيكلموني إن الـ 3 أفلام نازلين مع بعض، في الأول خوفت عشان كنت عاملة حسابي إن هينزل فيلم كل فترة وأنا هريح في النص وأخد أجازة، لكن كلهم نزلوا في وقت واحد فأنا دلوقت معنديش حاجة خلاص".
وعن رد فعلها حول نجاح الأفلام الثلاث، أعربت “المفتي” عن سعادتها بردود أفعال الجمهور، مضيفة: "الأفلام التلاتة مختلفين وكل واحد فيهم تحس إن ليه جمهوره، وبصراحة التلاتة ناجحين أوي، قعدوا يقولولي انتي حاطة في بطنك بطيخة صيفي وضامنة إيرادات العيد لكن أنا كنت خايفة إن الناس ميعجبهاش أي دور من الأدوار، كنت خايفة الناس متحبينيش بس الحمد لله".
وبسؤالها عن كواليس تعاونها مع المخرج مروان حامد في فيلم "كيرة والجن"، قالت هدى المفتي: "أستاذ مروان حامد كمخرج مختلف تماما، أي حد يتمنى يشتغل معاه، خصوصا لو هيحطك في دور جديد، زي ما يكون هيصبك في قالب معين وهيشكلك بتشكيلة جديدة، فكنت متأكدة إن هبقى طالعة حاجة صح جدا.. لذلك في العرض الأول للفيلم كنت مبسوطة أوي وحاسة بالرضا عن نفسي وإني قدمت دور مهم".
