تحدث هشام يكن نجم نادي الزمالك السابق عن إدارة ناديه في الوقت الحالي مؤكدًا عدم رضاه عن الصفقات التي تم التعاقد معها مؤخرًا.
وقال يكن في تصريحات تلفزيونية أمس الإثنين "النهاردة نادي الزمالك مش هتقدر تشتغل فيه لان في ناس موجودة جوة، العيلة مسيطرة جوة نادي الزمالك ودي حاجة تجنن".
وواصل "أنا لما كان والدي يمشي في النادي كنت بمشي في ناحية تانية علشان ميتقالش ان يكن وابنه في النادي مع بعض، ده كان زمان لكن دلوقتي عيلة مرتضى منصور بتدير النادي".
وأضاف "مين يتكلم في الموضوع ده؟ أحمد وامير واخدين اكبر من حجمهم في نادي الزمالك، لما يمسكنا واحد ملعبش كورة ليه؟ في ناس بتوافق على ده ومعندهاش جرأة تقف قدام حد وبيخافوا كل واحد وطبيعته".
وأردف "انا مش بخاف من حد غير ربنا ولا فارق معايا اي حد، انا يفرق معايا الزمالك وجماهيره وشكل النادي، انا شايف النادي مخنوق ومفيش تطوير في نادي الزمالك، ادخلوا شوفوا نادي الزمالك من جوة بحق وحقيقي، ادخل اقعد شوف هتلاقي كرسي واحد حتى، وشوف مين الي قاعد معاك".
واستكمل يكن تصريحاته "صفقات أمير مرتضى؟ اديني المكان ده واجيبلك صفقات الدنيا كلها ولعيبة بجد، فين الصفقات الي جايبها أمير؟".
مختتمًا تصريحاته "الصفقات الي بتيجي لما اعملها يا اما بسد فراغ في الفرقة يا اجيب صفقة لاعب مميز جدا علشان يعمل فارق مستوى واهداف، دي صفقات سوبر وبتيجي علشان تعمل مستوى، لكن بجيب لعيبة اقارنها بالي عندي مش بلاقي فارق مع الي موجود".
