موجتين حنان
موجتين حنان
أنا أمى شايفة فيَّا م الحياة بكرة
وبتزرع الحلم جوايَا
فكرة
ورا فكرة
تعملنى مسند ضهرها لما نروح الغيط
تحكينى قصة حب قبل النوم
أخْرتها قاضية
على هموم الكون
أنا العروس فيها
والمَلِك عشّاق
بيمد لى
سلالم الهنا درجات
الله ياقدرة ربنا
على أخرة الصابرين
مُلْك الملك مِلْكى
فدادين ورا فدادين
من قلب أمى اتفرد
ولْحدْ يوم الدين
«نام نام
وادبحلك جوزين حمام»
وإن طلع الصبح إصحى قوام
عشك حجرى
وإنْ قمت إجرى..
بس هتنسى لبس كَوِتْشك
وحياة أمك لهسكعلك بالأقلام
تعرفى يا أمّا
أنا بافتكرك
وإنتى بتنبحى صوتك معيا
وأنا مش فارق معيا زعيقك
علشان إحساس حبك ليا مالى وريدك
حاسُّه ف لمسة مشط الشعر بكفّة إيدك
حاسُّه ف رغبة روحك تدى
قبل ما يطلع منى كلام
