صداع
صداع
برجل فوق رجل..
يا دنيا، قابلتك
كأنى، صاحى..
ولسه ما انقتلتش
ولسه عينى..
ما صابهاش، العمى/
كأنى سفاح شيكاغو
ذائع الصيت
ب دم، بارد..
وسكينة تلمة
سكرت، لك..
وابتديت..
فى جز عشبك
اللى على دلتا سيقانك نما
يا مغرمة،
بالفرانكو..
والترقيم/
أنا الرقيم..
اللى جالك
م العصور الوسطى..
وجاب، م الكهوف..
أنياب أسود..
صارعها.. زمان،
ف الحروب المظلمة/
قولى لى: دلوقت..
بعد العمر، ما غاب
إزاى أسود،
فى الفضاء..
التكنولوجى/
ع الفيس نديت،
والإنستا،
والواتس آب،
ردوا يا أحباب
على الصب المتيم/
خلوا..
هدير الدموع
يعتق، ودانى
من فين..
ما جانى الصداع
جاتنى، الأغانى
من فين..
ما جاتنى الأغانى
جانى، صداع/
أنسى وداع القمر..
جوا المخيم
وأبدأ صراع
بين مشاعرى
والإيموجى/
كان ينتهى..
لما شاشات عينى تطفى
ويسيل على..
خدى، شلالات نياجرا
أرقص معاكى ف خيالى،
وألمسك..
تختفى.. كأنك..
ما كنتيش من أساسه/
أبكى عليكى ف خيالى،
أهمسك.. تعطفى..
كأنك حقيقة، مش خيال/
أبرم شناب..
ضحكتى من غير فياجرا
أطلع لسابع سما..
أتذل.. أنزل
كأنى يا دنيا..
سهم ف بورصة نيويورك/
أعمل بآخر فليكس..
ريأكت ضاحك
وأدخل كهوف..
الجراح المؤلمة/
وبكبرياء،
جندى مهزوم،
باقته خلصت
تلف ساقى..
على ساقى..
فاقول لك،
برجل فوق رجل..
يا دنيا، قابلتك
كأنى، صاحى..
ولسه ما انقتلتش
ولسه عينى..
ما صابهاش، العمى/
